Davlat soliq qo‘mitasi tomonidan o‘tgan hafta davomida joylarda nazorat-kassa mashinasi va to‘lov terminalidan foydalanmaslik hamda tushumlarni bank kassalariga to‘liq topshirmaslik holatlari bo‘yicha 429 ta tekshirish o‘tkazilib, ularning barchasida qoidabuzarlik holatlari aniqlandi. Bu haqda qo‘mita axborot xizmati xabar bermoqda.
O‘tkazilgan tekshirishlarning aksariyatida savdo va pullik xizmat ko‘rsatish subyektlari tomonidan nazorat-kassa mashinasini qo‘llamasdan tovarlar sotish va xizmatlar ko‘rsatish, tushumlarni bank kassalariga topshirmasdan yashirish, to‘lov shaklidan kelib chiqib, narxlarni sun’iy ravishda oshirish yoki pasaytirish, hisob-kitob terminalidan foydalanish qoidalarini buzish, shuningdek, hech qanday hujjatlarsiz tovarlarni noqonuniy sotish kabi holatlar aniqlangan.
Jumladan, fuqarolar murojaati asosida o‘tkazilgan nazorat tadbirida Surxondaryo viloyatining Sho‘rchi tumanida faoliyat ko‘rsatib kelayotgan yakka tartibdagi tadbirkor S.B.ga qarashli shoxobchada nazorat-kassa mashinasi xotirasiga kirim qilinmagan 5 million 567 ming so‘m naqd pul borligi ma’lum bo‘ldi.
Ana shunday huquqbuzarlik Uzun tumanida faoliyat ko‘rsatib kelayotgan yakka tartibdagi tadbirkorga qarashli “Hamro Sabrina” korxonasi shoxobchasida ham kuzatildi. O‘tkazilgan nazorat tadbirida ushbu shoxobchada savdodan tushgan 1 million 774 ming so‘m naqd pul borligi aniqlandi.
Ushbu holatlar bo‘yicha belgilangan tartibda dalolatnomalar rasmiylashtirilib, qoidabuzarlarga nisbatan tegishli choralar qo‘llanildi.
Izoh (0)