Latviyada O‘zbekistonning savdo-iqtisodiy salohiyati borasida seminar bo‘lib o‘tdi

Latviyada “O‘zbekiston—Latviya savdo-iqtisodiy va sarmoyaviy hamkorligi. Tadbirkorlik faoliyatida yangi imkoniyatlar” mavzusida seminar bo‘lib o‘tdi, deb xabar berdi UzDaily.

Seminar O‘zbekiston Respublikasi Oliy Majlisi Senati raisi Nig‘matilla Yo‘ldoshev boshchiligidagi parlament delegatsiyasining Latviya Respublikasiga 2017-yilning 15—18-may kunlari amalga oshirilgan tashrifi doirasida bo‘lib o‘tdi.

O‘zbekiston Savdo-sanoat palatasi matbuot xizmatining xabar berishicha, seminar ishida O‘zbekiston va Latviya davlat tuzilmalari hamda ishbilarmon doiralari vakillari ishtirok etgan.

Senati raisi Nig‘matilla Yo‘ldoshevning ta’kidlashicha, Latviya O‘zbekistonning ishonchli hamda vaqt sinovidan o‘tgan siyosiy va iqtisodiy hamkori hisoblanadi.

Hozirda O‘zbekistonda Latviya investorlari ishtirokida 47 ta korxona, jumladan, 13 tasi Latviya tomonidan 100 foiz moliyalashtirilgan. 15 ta Latviya kompaniya vakolatxonasi akkreditatsiya qilingan.

O‘zbekiston delegatsiyasi latviyalik tadbirkorlarga O‘zbekistonda oziq-ovqat va yengil sanoat, shuningdek, muqobil energetika sohasida qo‘shma sarmoyaviy loyihalarni amalga oshirishda ishtirok etish taklifini berdi.

O‘zbekiston korxonalari Latviyaga turli mahsulotlarni yetkazib berishga tayyorligi alohida qayd etildi. Shuningdek, seminar qatnashchilari transport va logistika sohasidagi hamkorlik masalalarini ham muhokama qildi.

Seminar doirasida tekstil va oziq-ovqat sanoatida ishlovchi qator o‘zbek kompaniyalari mahsuloti ekspozitsiyasi tashkil etildi.

Shu bilan birga, O‘zbekiston kichik biznes sub’yektlari va xususiy tadbirkorlikni qo‘llab-quvvatlash Fondi hamda Latviya stividorlar Assotsiatsiyasi o'rtasida, “O‘zagroeksport” Aksiyadorlik jamiyati va A Fruits (Latviya) kompaniyasi Riga shahrida Savdo uyini tashkil etish to‘g‘risida, “O‘zbekoziqovqatzaxira” Assotsiatsiyasi va BIOR Ilmiy-tadqiqot laboratoriyasi vakillari o‘rtasida laboratoriya tadqiqotlari sohasida o‘zaro anglashuv va hamkorlik to‘g‘risida memorandumlar imzolandi.

Tadbir yakunida O‘zbekiston Savdo-sanoat palatasi va Latviyaning sarmoyalar hamda taraqqiyot Agentligi o‘rtasida hamkorlik haqida bitim imzolandi.