2017-yilning 23-may kuni O‘zbekiston Respublikasi Tashqi ishlar vaziri Abdulaziz Komilov O‘zbekistonga tashrif buyurgan Yevropa parlamentining Inson huquqlari bo‘yicha kichik qo‘mitasi delegatsiyasini qabul qildi, deb xabar berdi vazirlik matbuot xizmati.
Delegatsiya tarkibidan deputatlar Yozef Vaydenholzer (Avstriya), Klaus Buxner va Yoaxim Zeller (Germaniya) o‘rin olgan.
Yevropa deputatlari tashrifi dasturidan O‘zbekiston Respublikasi Oliy Majlisi palatalari, vazirlik va idoralar hamda fuqarolik jamiyati vakillari bilan uchrashuv va muzokaralar o‘rin olgan.
TIVda bo‘lib o‘tgan suhbat davomida Yevroparlamentning Inson huquqlari bo‘yicha kichik qo‘mitasi kun tartibiga kiruvchi sohalarda O‘zbekiston va Yevropa Ittifoqi o‘rtasidagi ikki tomonlama munosabatlarning hozirgi holati va istiqbollari muhokama qilindi.
Deputatlar iltimosiga binoan 2017—2021-yillarda O‘zbekistonni rivojlantirishning beshta ustuvor yo‘nalishi bo‘yicha Harakatlar strategiyasini amalga oshirish doirasida olib borilayotgan keng ko‘lamli islohotlar to‘g‘risida Yevropa tomoniga ma’lumot berildi. Demokratik huquqiy davlat qurish va kuchli fuqarolik jamiyatini shakllantirishga qaratilgan izchil harakatlar islohotlarning ajralmas qismi hisoblanishi ta’kidlandi.
Uchrashuvda tomonlarni qiziqtirgan boshqa masalalar ham ko‘rib chiqildi.
Suhbatda Yevropa Ittifoqining O‘zbekistondagi delegatsiyasi boshlig‘i, elchi Eduards Striprays ishtirok etdi.
Izoh (0)