Politsiya Manchesterdagi teraktga aloqadorlikda gumonlanayotgan shaxsni qo‘lga oldi

Britaniya politsiyasi Manchesterdagi teraktga aloqador deb hisoblanayotgan 23 yoshli gumonlanuvchini qo‘lga oldi. Bu haqda mintaqa politsiyasi o‘zining Twitter’dagi rasmiy sahifasida xabar berdi, deb yozadi Meduza.

Huquq-tartibot organlari hozircha gumonlanuvchining ismi va tergovning boshqa tafsilotlarini oshkor etmadi.

The Guardian portlashdan so‘ng yana bir kishi qo‘lga olinganini xabar berdi. Ammo dastlabki surishtiruv natijalari uning teraktga aloqasi yo‘qligini ko‘rsatdi.

Buyuk Britaniya bosh vaziri Tereza Mey mamlakat fuqarolariga qilgan murojaatida politsiya Manchester Arena’da portlovchi qurilmani harakatga keltirgan xudkush terrorchi shaxsini aniqlaganini ma’lum qildi, ammo uning ismini oshkor etmadi.

Eslatib o‘tamiz, Manchester Arena stadionida 22-may, dushanba kuni Ariana Grandening konserti vaqtida portlash sodir bo‘ldi. So‘nggi ma’lumotlarga ko‘ra, stadiondagi portlash oqibatida 22 kishi halok bo‘lgan, 59 kishi jarohatlangan. Hodisa uchun javobgarlikni IShID terrorchilik guruhi o‘z zimmasiga oldi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.