Британия полицияси Манчестердаги терактга алоқадор деб ҳисобланаётган 23 ёшли гумонланувчини қўлга олди. Бу ҳақда минтақа полицияси ўзининг Twitter’даги расмий саҳифасида хабар берди, деб ёзади Meduza.
Ҳуқуқ-тартибот органлари ҳозирча гумонланувчининг исми ва терговнинг бошқа тафсилотларини ошкор этмади.
The Guardian портлашдан сўнг яна бир киши қўлга олинганини хабар берди. Аммо дастлабки суриштирув натижалари унинг терактга алоқаси йўқлигини кўрсатди.
Буюк Британия бош вазири Тереза Мэй мамлакат фуқароларига қилган мурожаатида полиция Manchester Arena’да портловчи қурилмани ҳаракатга келтирган худкуш террорчи шахсини аниқлаганини маълум қилди, аммо унинг исмини ошкор этмади.
Эслатиб ўтамиз, Manchester Arena стадионида 22 май, душанба куни Ариана Гранденинг концерти вақтида портлаш содир бўлди. Сўнгги маълумотларга кўра, стадиондаги портлаш оқибатида 22 киши ҳалок бўлган, 59 киши жароҳатланган. Ҳодиса учун жавобгарликни ИШИД террорчилик гуруҳи ўз зиммасига олди.
ИШИД экстремистик гуруҳи жаҳоннинг бир қатор мамлакатлари ва халқаро ташкилотлар томонидан «террорчилик ташкилоти» деб топилган.
Изоҳ (0)