Tereza Mey Manchesterda terakt sodir etgan terrorchi shaxsi aniqlanganini ma’lum qildi

Buyuk Britaniya bosh vaziri Tereza Mey mamlakat fuqarolariga qilgan murojaatida politsiya Manchester Arena’da portlovchi qurilmani harakatga keltirgan xudkush terrorchi shaxsini aniqlaganini ma’lum qildi. Bu haqda “RBK” xabar bermoqda.

Bosh vazirning so‘zlariga ko‘ra, politsiya xudkush terrorchi shaxsini va u teraktni bir o‘zi amalga oshirganini aniqladi. Terrorchining ismi tergov manfaatlari yuzasidan hozircha oshkor qilinmadi.

Eslatib o‘tamiz, Manchester Arena stadionida 22-may, dushanba kuni Ariana Grandening konserti vaqtida portlash sodir bo‘ldi. So‘nggi ma’lumotlarga ko‘ra, stadiondagi portlash oqibatida 22 kishi halok bo‘lgan, 59 kishi jarohatlangan. Hodisa uchun javobgarlikni IShID terrorchilik guruhi o‘z zimmasiga oldi.

IShID ekstremistik guruhi jahonning bir qator mamlakatlari va xalqaro tashkilotlar tomonidan “terrorchilik tashkiloti” deb topilgan.