Toshkent shahar IIBB 4-may, payshanba kuni bo‘lib o‘tgan brifingda joriy yilning 13 va 27-aprelida “O‘zbekiston” telekanalida efirga uzatilgan “Muloqot vaqti” ko‘rsatuviga rasmiy munosabat bildirdi.
Ko‘rsatuvda ichki ishlar idoralarining faoliyati, xodimlarning xatti-harakati tanqid ostiga olingan. Shuningdek, ko‘rsatuvda ayrim fuqarolarning ichki ishlar idoralari faoliyatiga nisbatan munosabati ham namoyish etilgan.
Ko‘rsatuvga intervyu bergan fuqarolar ba’zi ichki ishlar idoralari xodimlarining o‘z vazifasiga nomunosibligi, murojaatlarni o‘z vaqtida hal qilmasligi haqida gapirgan.
“Muloqot vaqti” ko‘rsatuvida namoyish etilgan kadrlardan birida bir guruh bolalarning mushtlashayotgani va ichki ishlar xodimining ularning yonidan befarq o‘tib ketayotgani aks etgan.
Holat yuzasidan olib borilgan tekshiruv natijasida aniqlanishicha, ushbu kadrlar aslida 2014-yilning 7-oktabrida “O‘zbekiston” telekanalining “Olov bilan o‘ynashganlar” ko‘rsatuvida namoyish etilgan. Mazkur ko‘rsatuvda yosh bolalarning sahnalashtirilgan urush-janjali lavhalaridan foydalanilgan.
Toshkent shahar IIBBning rasmiy murojaatida qayd etilishicha, bu lavha urush-janjal bo‘lgan joyda ichki ishlar xodimlari umuman bo‘lmaydi, degan taassurotni yuzaga keltirgan. “Vaholanki, har bir kelib tushadigan murojaatga zudlik bilan tegishli chora ko‘riladi”, — deyiladi IIBB murojaatida.
Toshkent shahar IIBB ko‘rsatuvda intervyusi namoyish etilgan aholi vakillarining muammolarini o‘rganish yuzasidan tekshiruv o‘tkazgan. Intervyu berganlar orasidan fuqaro Qodirovning muammosi o‘rganilgan.
Tekshiruv davomida aniqlanishicha, fuqaro Fathulla Qodirov hozirgi vaqtda Olmazor tumanidagi uyida yetti nafar aka-uka va opa-singillari bilan birga ro‘yxatda turadi. Ota-onasining vafotidan so‘ng, ularning o‘rtasida mol-mulk, meros taqsimoti bo‘yicha uzoq vaqt davomida oilaviy kelishmovchilik bo‘lgan.
Xususan, 2008-yilning 5-sentabridagi Shayxontohur tumani tumanlararo sudining hal qiluv qaroriga ko‘ra, uy-joyga merosxo‘rlar Fathulla Qodirov, Shavkat Qodirov, Qudratilla Qodirov, Muxtabar Qodirova, Nazima Tursunova, Kaima Shosalimova va Naila Odilova merosxo‘r deb topilib, uy-joyni har bir xonadon egasiga 1/7 qism miqdorida taqsimlash belgilangan.
2008-yildan 2016-yilga qadar Qodirovlar oilasining merosxo‘r deb ulushlarini belgilash to‘g‘risidagi nizolar fuqarolik ishlari bo‘yicha sudlarning barcha instansiyalari tomonidan bir necha marta ko‘rib chiqilib, nizolar sud tomonidan qonuniy hal etilgan.
Bundan tashqari, 2013-yil 24-maydagi Toshkent shahar Olmazor tumani jinoiy ishlar bo‘yicha sudining ajrimiga asosan, nizoli bo‘lgan xonadonning ayrim kadastr hujjatlari qalbakilashtirilgani holati yuzasidan kadastr bo‘limi xodimiga nisbatan Jinoyat kodeksining 228-moddasi bilan qonuniy chora ko‘rilgan.
2016-yil 10-avgustda fuqaro Fathulla Qodirov aynan shu nizoli uy-joy masalasi bo‘yicha Yakkasaroy tumani ichki ishlar bo‘limiga yozgan arizasi yuzasidan surishtiruv harakatlari olib borilib, qonuniy qaror qabul qilingan.
Holatni o‘rganish vaqtida fuqaro bilan suhbat o‘tkazilganda, u televideniye xodimlari undan ichki ishlar idoralari xodimlari faoliyati haqidagi fikrlarini so‘raganini aytgan.
Fuqaroning so‘zlariga ko‘ra, u ichki ishlar idoralari xodimlarining jinoyatchilikka qarshi kurashidan minnatdor ekanligini aytib, ba’zi kasbiga noloyiq xodimlar borligini ham ta’kidlagan.
Uning aytishicha, televideniye xodimlari uning faqat kasbiga noloyiq ichki ishlar xodimlari haqidagi fikrlarini namoyish etgan.
“Ko‘rsatuvda fikr bildirgan boshqa fuqarolarni aniqlash va ularning muammolarini o‘rganish bo‘yicha tekshiruv ishlari davom etmoqda”, — deyiladi IIBB murojaatida.
Hurmatli fuqarolar! Agar ichki ishlar idoralarining o‘z xizmat burchiga mas’uliyatsizlik bilan yondashishiga guvoh bo‘lsangiz, ichki ishlar organlarining 1102 ishonch telefoniga murojaat qiling. Har bir murojaat bo‘yicha tegishli tekshiruv olib borilib, o‘z tasdig‘ini topgan murojaat yuzasidan aybdor xodimlarga nisbatan qat’iy intizomiy ta’sir choralar: ichki ishlar organlaridan bo‘shatish, hattoki jinoyat ishi qo‘zg‘atish masalasi ko‘riladi.Toshkent shahar IIBBning rasmiy murojaati
Izoh (0)