Тошкент шаҳар ИИББ 4 май, пайшанба куни бўлиб ўтган брифингда жорий йилнинг 13 ва 27 апрелида «Ўзбекистон» телеканалида эфирга узатилган «Мулоқот вақти» кўрсатувига расмий муносабат билдирди.
Кўрсатувда ички ишлар идораларининг фаолияти, ходимларнинг хатти-ҳаракати танқид остига олинган. Шунингдек, кўрсатувда айрим фуқароларнинг ички ишлар идоралари фаолиятига нисбатан муносабати ҳам намойиш этилган.
Кўрсатувга интервью берган фуқаролар баъзи ички ишлар идоралари ходимларининг ўз вазифасига номуносиблиги, мурожаатларни ўз вақтида ҳал қилмаслиги ҳақида гапирган.
«Мулоқот вақти» кўрсатувида намойиш этилган кадрлардан бирида бир гуруҳ болаларнинг муштлашаётгани ва ички ишлар ходимининг уларнинг ёнидан бефарқ ўтиб кетаётгани акс этган.
Ҳолат юзасидан олиб борилган текширув натижасида аниқланишича, ушбу кадрлар аслида 2014 йилнинг 7 октябрида «Ўзбекистон» телеканалининг «Олов билан ўйнашганлар» кўрсатувида намойиш этилган. Мазкур кўрсатувда ёш болаларнинг саҳналаштирилган уруш-жанжали лавҳаларидан фойдаланилган.
Тошкент шаҳар ИИББнинг расмий мурожаатида қайд этилишича, бу лавҳа уруш-жанжал бўлган жойда ички ишлар ходимлари умуман бўлмайди, деган таассуротни юзага келтирган. «Ваҳоланки, ҳар бир келиб тушадиган мурожаатга зудлик билан тегишли чора кўрилади», — дейилади ИИББ мурожаатида.
Тошкент шаҳар ИИББ кўрсатувда интервьюси намойиш этилган аҳоли вакилларининг муаммоларини ўрганиш юзасидан текширув ўтказган. Интервью берганлар орасидан фуқаро Қодировнинг муаммоси ўрганилган.
Текширув давомида аниқланишича, фуқаро Фатҳулла Қодиров ҳозирги вақтда Олмазор туманидаги уйида етти нафар ака-ука ва опа-сингиллари билан бирга рўйхатда туради. Ота-онасининг вафотидан сўнг, уларнинг ўртасида мол-мулк, мерос тақсимоти бўйича узоқ вақт давомида оилавий келишмовчилик бўлган.
Хусусан, 2008 йилнинг 5 сентябридаги Шайхонтоҳур тумани туманлараро судининг ҳал қилув қарорига кўра, уй-жойга меросхўрлар Фатҳулла Қодиров, Шавкат Қодиров, Қудратилла Қодиров, Мухтабар Қодирова, Назима Турсунова, Каима Шосалимова ва Наила Одилова меросхўр деб топилиб, уй-жойни ҳар бир хонадон эгасига 1/7 қисм миқдорида тақсимлаш белгиланган.
2008 йилдан 2016 йилга қадар Қодировлар оиласининг меросхўр деб улушларини белгилаш тўғрисидаги низолар фуқаролик ишлари бўйича судларнинг барча инстанциялари томонидан бир неча марта кўриб чиқилиб, низолар суд томонидан қонуний ҳал этилган.
Бундан ташқари, 2013 йил 24 майдаги Тошкент шаҳар Олмазор тумани жиноий ишлар бўйича судининг ажримига асосан, низоли бўлган хонадоннинг айрим кадастр ҳужжатлари қалбакилаштирилгани ҳолати юзасидан кадастр бўлими ходимига нисбатан Жиноят кодексининг 228-моддаси билан қонуний чора кўрилган.
2016 йил 10 августда фуқаро Фатҳулла Қодиров айнан шу низоли уй-жой масаласи бўйича Яккасарой тумани ички ишлар бўлимига ёзган аризаси юзасидан суриштирув ҳаракатлари олиб борилиб, қонуний қарор қабул қилинган.
Ҳолатни ўрганиш вақтида фуқаро билан суҳбат ўтказилганда, у телевидение ходимлари ундан ички ишлар идоралари ходимлари фаолияти ҳақидаги фикрларини сўраганини айтган.
Фуқаронинг сўзларига кўра, у ички ишлар идоралари ходимларининг жиноятчиликка қарши курашидан миннатдор эканлигини айтиб, баъзи касбига нолойиқ ходимлар борлигини ҳам таъкидлаган.
Унинг айтишича, телевидение ходимлари унинг фақат касбига нолойиқ ички ишлар ходимлари ҳақидаги фикрларини намойиш этган.
«Кўрсатувда фикр билдирган бошқа фуқароларни аниқлаш ва уларнинг муаммоларини ўрганиш бўйича текширув ишлари давом этмоқда», — дейилади ИИББ мурожаатида.
Ҳурматли фуқаролар! Агар ички ишлар идораларининг ўз хизмат бурчига масъулиятсизлик билан ёндашишига гувоҳ бўлсангиз, ички ишлар органларининг 1102 ишонч телефонига мурожаат қилинг. Ҳар бир мурожаат бўйича тегишли текширув олиб борилиб, ўз тасдиғини топган мурожаат юзасидан айбдор ходимларга нисбатан қатъий интизомий таъсир чоралар: ички ишлар органларидан бўшатиш, ҳаттоки жиноят иши қўзғатиш масаласи кўрилади.Тошкент шаҳар ИИББнинг расмий мурожаати
Изоҳ (0)