Wikipedia asoschisi Jimmi Ueyls soxta ma’lumotlardan xoli tekshirilgan materiallarni e’lon qiluvchi yangi media loyihani ishga tushirilishini ma’lum qildi. Bu haqda Meduza xabar berdi.
WikiTribune platformasi yangiliklar yozish uchun professional jurnalistlarni va o‘quvchilar jamoasini birlashtirishni maqsad qilib qo‘ygan.
WikiTribune’da yangilik e’lon qiluvchi jurnalistlar majburiy tartibda o‘zi berayotgan axborot manbasini ko‘rsatishi, shuningdek, ishda qo‘llanilgan materiallarni ochiq foydalanishga qo‘yishi kerak bo‘ladi.
WikiTribune a’zolari, o‘z navbatida, jurnalistlarga maqola uchun mavzu taklif qilishi va dalillarni tekshirishda yordam berishi mumkin bo‘ladi. Saytga kirgan har bir foydalanuvchi materiallarni tahrir qilish imkoniga ega bo‘ladi. Biroq tahrir jamoa a’zolari tomonidan tasdiqlanishi kerak bo‘ladi.
Ueylsning so‘zlariga ko‘ra, WikiTribune butunlay reklamadan xoli va bepul bo‘ladi.
WikiTribune’ning biznes-modeli platforma ishida faol ishtirok etishni xohlovchilar oylik to‘lovi taxminan 15 dollar bo‘ladigan maxsus ro‘yxatdan o‘tishini ko‘zda tutadi. Obunachilar bir qator imtiyozlarga ega bo‘ladi, masalan, ularning ovozi mavzu tanlashda alohida ahamiyat kasb etadi.
Jimmi Ueylsning ta’kidlashicha, WikiTribune mustaqil loyiha hisoblanadi va Wikipedia hamda Wikimedia jamg‘armasi bilan umuman bog‘liq emas.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)