Wikipedia асосчиси ишончли янгиликлар сайтини ишга туширди

Wikipedia асосчиси Жимми Уэйлс сохта маълумотлардан холи текширилган материалларни эълон қилувчи янги медиа лойиҳани ишга туширилишини маълум қилди. Бу ҳақда Meduza хабар берди.

WikiTribune платформаси янгиликлар ёзиш учун профессионал журналистларни ва ўқувчилар жамоасини бирлаштиришни мақсад қилиб қўйган.

WikiTribune’да янгилик эълон қилувчи журналистлар мажбурий тартибда ўзи бераётган ахборот манбасини кўрсатиши, шунингдек, ишда қўлланилган материалларни очиқ фойдаланишга қўйиши керак бўлади.

WikiTribune аъзолари, ўз навбатида, журналистларга мақола учун мавзу таклиф қилиши ва далилларни текширишда ёрдам бериши мумкин бўлади. Сайтга кирган ҳар бир фойдаланувчи материалларни таҳрир қилиш имконига эга бўлади. Бироқ таҳрир жамоа аъзолари томонидан тасдиқланиши керак бўлади.

Уэйлснинг сўзларига кўра, WikiTribune бутунлай рекламадан холи ва бепул бўлади.

WikiTribune’нинг бизнес-модели платформа ишида фаол иштирок этишни хоҳловчилар ойлик тўлови тахминан 15 доллар бўладиган махсус рўйхатдан ўтишини кўзда тутади. Обуначилар бир қатор имтиёзларга эга бўлади, масалан, уларнинг овози мавзу танлашда алоҳида аҳамият касб этади.

Жимми Уэйлснинг таъкидлашича, WikiTribune мустақил лойиҳа ҳисобланади ва Wikipedia ҳамда Wikimedia жамғармаси билан умуман боғлиқ эмас.

«Дарё»нинг Telegram’даги расмий канали — @toshqindaryo’га аъзо бўлинг!