Erdo‘g‘on: Asad hokimiyat tepasida turgan vaqtda Suriyadagi nizoni hal qilib bo‘lmaydi

Turkiya prezidenti Rajab Toyyib Erdo‘g‘on Reuters agentligiga bergan intervyusida Bashar Asad hokimiyat tepasida qoladigan bo‘lsa, Suriyadagi nizoni tartibga solib bo‘lmasligini aytdi, deb yozadi “Gazeta.ru”.

“Asad Suriyadagi vaziyatni tartibga solishda yechim emas. Yechim yuzaga kelishi uchun Suriya Asaddan ozod etilishi kerak”, — dedi Erdo‘g‘on.

Turkiya prezidenti so‘zlariga ko‘ra, Asad “o‘z xalqiga tanklar, to‘plar, bochkasimon bombalar, kimyoviy qurol va qiruvchilar bilan hujum qilgan”.

“Nima deb o‘ylaysiz, u muammoni hal qilish vositasi bo‘la oladimi?” — deya qo‘shib qo‘ydi u.

Erdo‘g‘on ta’kidlashicha, Rossiya, AQSh, Turkiya, Eron, Saudiya Arabistoni va Qatar “birlashib, Suriya xalqiga o‘z qarorini qabul qilishda yordam berishi mumkin”.