NATO sammitida tuzilmaga a’zo davlatlarning harbiy xarajatlarni ko‘paytirish rejalari ko‘rib chiqiladi

NATOning 25-may kuni bo‘lib o‘tadigan sammitida tuzilmaga a’zo davlatlarning har biri milliy rejalarni qabul qilishi lozim. Bu haqda alyans bosh kotibi Yens Stoltenberg ma’lum qildi, deya xabar beradi “TASS”.

“Sammitda NATOning har bir davlati uchun harbiy xarajatlarni yalpi ichki mahsulotning 2 foizigacha ko‘tarish doirasidagi majburiyatlarini bajarish bo‘yicha milliy rejalarini tayyorlash niyatidamiz. Ikkinchi mavzu esa NATOning chegaralaridan tashqarida barqarorlikni ta’minlashga qaratilgan harakatlari va aksilterror imkoniyatlari muhokamasi bo‘ladi”, — deya ta’kidladi Stoltenberg.

Alyans bosh kotibiga ko‘ra, Ruminiya harbiy xarajatlarning yuqoridagi ko‘rsatkichiga shu yili yetadi. Latviya va Litva esa buni kelgusi yilda amalga oshirishni va’da qilgan. “Daryo”ning Telegram’dagi rasmiy kanali — @toshqindaryo’ga a’zo bo‘ling!