Nyu-Yorkdagi Oliy okrug sudi apellyatsiya bo‘limi tutqunlikda yashayotgan ikki shimpanze — Tommi va Kikoni shaxs deb hisoblash kerakmi yoki yo‘qmi degan masala bo‘yicha tekshirishni boshladi. Bu haqda Amerikaning tegishli so‘rov bilan murojaat qilgan Nonhuman Rights Project tashkiloti saytida aytiladi.
Birlashma prezidenti, advokat Stiven Uayz fikricha, Amerika hukumati ushbu odamsimon maymunlarga odamlarda bo‘lgan qator huquqlarni taqdim etishi kerak. Huquqshunos talab qilishicha, ular tutqunlikda saqlanmasligi va Floridadagi qo‘riqxonaga qo‘yib yuborilishi kerak.
O‘z navbatida, Tommi va Kikoning Nyu-Yorkda yashaydigan egalari jonivorlar yovvoyi tabiatda inson ko‘magisiz yashab keta olmasligini ta’kidlamoqda. Kiko kar bo‘lib, doimiy ravishda veterinar nazorati ostida bo‘lishi kerak, Tommi esa zaharlab o‘ldirilishi kerak bo‘lgan vaziyatda hozirgi xo‘jayini tomonidan qutqarib olingan.
Bu Uayzning AQSh hukumati shimpanzelarni shaxs deb tan olishiga erishish uchun birinchi urinishi emas. 2014-yilda Nyu-York shtati sudi uning Tommi va Kikoga nisbatan masala bo‘yicha da’vosini rad etgach, u apellyatsiya bergan edi.
Izoh (0)