Нью-Йоркдаги Олий округ суди апелляция бўлими тутқунликда яшаётган икки шимпанзе — Томми ва Кикони шахс деб ҳисоблаш керакми ёки йўқми деган масала бўйича текширишни бошлади. Бу ҳақда Американинг тегишли сўров билан мурожаат қилган Nonhuman Rights Project ташкилоти сайтида айтилади.
Бирлашма президенти, адвокат Стивен Уайз фикрича, Америка ҳукумати ушбу одамсимон маймунларга одамларда бўлган қатор ҳуқуқларни тақдим этиши керак. Ҳуқуқшунос талаб қилишича, улар тутқунликда сақланмаслиги ва Флоридадаги қўриқхонага қўйиб юборилиши керак.
Ўз навбатида, Томми ва Киконинг Нью-Йоркда яшайдиган эгалари жониворлар ёввойи табиатда инсон кўмагисиз яшаб кета олмаслигини таъкидламоқда. Кико кар бўлиб, доимий равишда ветеринар назорати остида бўлиши керак, Томми эса заҳарлаб ўлдирилиши керак бўлган вазиятда ҳозирги хўжайини томонидан қутқариб олинган.
Бу Уайзнинг АҚШ ҳукумати шимпанзеларни шахс деб тан олишига эришиш учун биринчи уриниши эмас. 2014 йилда Нью-Йорк штати суди унинг Томми ва Кикога нисбатан масала бўйича даъвосини рад этгач, у апелляция берган эди.
Изоҳ (0)