Turkmanobod—Farob temir yo‘l va avtomobil ko‘priklari ochilish marosimida ishtirok etgan O‘zbekiston Respublikasi Prezidenti Shavkat Mirziyoyev mazkur ko‘priklar nafaqat Turkmaniston, balki butun mintaqa uchun geostrategik ahamiyatga ega ekanini qayd etdi. Bu haqda O‘zA xabar bermoqda.
Shavkat Mirziyoyev O‘zbekistonda ham transport kommunikatsiyalarini rivojlantirish bo‘yicha ulkan ishlar amalga oshirilayotgani, xususan, o‘tgan yili qurilgan Angren — Pop temir yo‘li Markaziy Osiyoni Xitoy bilan temir yo‘l orqali bog‘laganini alohida ta’kidladi. O‘zbekiston va Turkmaniston temir yo‘llari o‘zaro integratsiyalashib, qayta tiklanayotgan Buyuk ipak yo‘lining muhim bo‘g‘inini tashkil etadi, mintaqa rivoji va xalqlar farovonligiga xizmat qiladi.
Prezident Gurbanguli Berdimuhamedov Turkmaniston transport va tranzit sohalarini rivojlantirish bo‘yicha tashabbuslarni ilgari surayotgani, ushbu ko‘priklar bu boradagi sa’y-harakatlarning amaliy ifodasi ekanini ta’kidladi. Qurilish ishlarining sifati va ahamiyatini yuqori baholab, quruvchi va pudratchilarga minnatdorlik bildirdi.
Turkmanobod shahridagi “Ruhiyat” saroyida O‘zbekiston va Turkmaniston san’at ustalarining konserti namoyish etildi. Saroy foyesida o‘zbek va turkman xalq amaliy san’ati buyumlari namoyish etildi. Bu o‘zbek va turkman xalqlarining bir-biriga yaqinligini yaqqol namoyon etdi, mamlakatlar zamonaviy va mumtoz san’ati bilan keng tanishish uchun qulay imkoniyat bo‘ldi.
Shu bilan Shavkat Mirziyoyevning Turkmanistonga davlat tashrifi yakuniga yetdi. Turkmanobod aeroportida O‘zbekiston Prezidentini Gurbanguli Berdimuhamedov kuzatib qo‘ydi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)