AQSh Senati 13-fevral, dushanba kuni Stiven Mnuchinni moliya vaziri lavozimiga tasdiqladi. Nomzodni yoqlab 53 senator ovoz berdi, 47 kishi qarshi chiqdi, deya xabar beradi “TASS”.
Vitse-prezident Maykl Pens shu kunning o‘zida yangi vazirni qasamyodga keltirdi. Marosim Oq uyda, prezident Donald Tramp ishtirokida bo‘lib o‘tdi.
Mnuchin 17 yil davomida Goldman Sachs bankida faoliyat olib borgan, vitse-prezident lavozimigacha ko‘tarilgan. Shundan so‘ng turli moliyaviy kompaniyalar, jumladan, kino sohasiga investitsiyalar kiritish bilan shug‘ullangan Dune Capital Management’ga rahbarlik qildi. U “Telba Maks: g‘azab yo‘li”, “Qotillar jamoasi”, “Betmen Supermenga qarshi: adolat tongida” kabi 35 film prodyuseri sanaladi.
Stiven Mnuchin 2016-yilda Donald Trampning saylovoldi kampaniyasi uchun mablag‘ yig‘ish bilan shug‘ullangan. Forbes 54 yoshli tadbirkorning mol-mulkini 300 million dollarga baholagandi.
“Daryo”ning Telegram’dagi rasmiy kanali — @toshqindaryo’ga a’zo bo‘ling!
Izoh (0)