Dunyoning ba’zi aviakompaniyalari Eron, Iroq, Suriya, Liviya, Yaman, Somali va Sudan fuqarolariga 90 kun davomida AQShga kirishni taqiqlash haqidagi qarordan so‘ng AQShga uchadigan reyslarning nafaqat yo‘lovchilari, balki ekipaj a’zolari tarkibini ham qayta ko‘rib chiqmoqda. Bu haqda Reuters’ga tayanib, “Newsru.com” xabar berdi.
Avvalroq aviakompaniyalar sayyohlik agentliklaridan eronliklarga AQShga uchish uchun chipta sotmaslikni, shuningdek, Eronning Amerika vizasiga ega fuqarolarini ham AQShga uchuvchi reyslarga chiqarmaslikni so‘ragan edi.
AQShning 11 ta shahriga parvozlarni amalga oshiruvchi Emirates Airlines aviakompaniyasi “taqiqlangan” davlatlar fuqarolarini AQShga uchuvchi havo kemalari uchuvchilari va bort kuzatuvchilari tarkibidan chiqarishiga to‘g‘ri keldi.
Etihad Airways qayd etishicha, hozirgi vaqtda cheklov uning xodimlariga ta’sir qilgani yo‘q, biroq kompaniya yaqin haftalar ichida muammolar kelib chiqmasligi uchun choralar ko‘rmoqda.
Qatar Airways, shanba kuni kompaniya saytida yo‘lovchilar AQShga kirish uchun yashil kartaga yoki diplomatik vizaga ega bo‘lishi kerakligi haqida ma’lum qilingan bo‘lsa ham, cheklovning ta’siri haqida izoh berishdan bosh tortdi.
Air France-KLM kompaniyasining ma’lumotlariga ko‘ra, 28 va 29-yanvar kunlari AQShga uchuvchi samolyotlarga cheklov ostidagi davlat fuqarosi ekanligi sababli chiqarilmagan yo‘lovchilar soni 20 kishiga yetdi. EgyptAir kompaniyasining xabar berishicha, AQShda amalga kiritilgan cheklov kimlarning parvoziga ruxsat berish haqida yetarlicha aniqlik bermagan, shu sababli aviakompaniya yo‘lovchilar ro‘yxatini oldindan Amerika rasmiylariga jo‘natib tasdiqlatib olishni boshladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)