Дунёнинг баъзи авиакомпаниялари Эрон, Ироқ, Сурия, Ливия, Яман, Сомали ва Судан фуқароларига 90 кун давомида АҚШга киришни тақиқлаш ҳақидаги қарордан сўнг АҚШга учадиган рейсларнинг нафақат йўловчилари, балки экипаж аъзолари таркибини ҳам қайта кўриб чиқмоқда. Бу ҳақда Reuters’га таяниб, «Newsru.com» хабар берди.
Аввалроқ авиакомпаниялар сайёҳлик агентликларидан эронликларга АҚШга учиш учун чипта сотмасликни, шунингдек, Эроннинг Америка визасига эга фуқароларини ҳам АҚШга учувчи рейсларга чиқармасликни сўраган эди.
АҚШнинг 11 та шаҳрига парвозларни амалга оширувчи Emirates Airlines авиакомпанияси «тақиқланган» давлатлар фуқароларини АҚШга учувчи ҳаво кемалари учувчилари ва борт кузатувчилари таркибидан чиқаришига тўғри келди.
Etihad Airways қайд этишича, ҳозирги вақтда чеклов унинг ходимларига таъсир қилгани йўқ, бироқ компания яқин ҳафталар ичида муаммолар келиб чиқмаслиги учун чоралар кўрмоқда.
Qatar Airways, шанба куни компания сайтида йўловчилар АҚШга кириш учун яшил картага ёки дипломатик визага эга бўлиши кераклиги ҳақида маълум қилинган бўлса ҳам, чекловнинг таъсири ҳақида изоҳ беришдан бош тортди.
Air France-KLM компаниясининг маълумотларига кўра, 28 ва 29 январь кунлари АҚШга учувчи самолётларга чеклов остидаги давлат фуқароси эканлиги сабабли чиқарилмаган йўловчилар сони 20 кишига етди. EgyptAir компаниясининг хабар беришича, АҚШда амалга киритилган чеклов кимларнинг парвозига рухсат бериш ҳақида етарлича аниқлик бермаган, шу сабабли авиакомпания йўловчилар рўйхатини олдиндан Америка расмийларига жўнатиб тасдиқлатиб олишни бошлади.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)