BMT Xavfsizlik kengashi Ukraina sharqidagi vaziyat keskinlashuvini 31-yanvar kuni yopiq tartibda muhokama qiladi. Bu haqda, “Gazeta.ru” xabariga ko‘ra, yanvar oyida kengashga raislik qilayotgan shvetsiyalik diplomat Olaf Skug ma’lum qilgan.
“Ukraina mamlakatdagi vaziyat yuzasidan maslahat so‘radi”, — deya ma’lum qildi Skug.
Avvalroq Ukraina prezidenti Pyotr Poroshenko mamlakat sharqidagi vaziyat keskinlashuvi haqidagi masala muhokamasini zudlik bilan BMT Xavfsizlik kengashi e’tiboriga havola qilish haqida ko‘rsatma bergani ma’lum qilingan edi.
Eslatib o‘tamiz, Donbassdagi bo‘linish chizig‘i bo‘ylab jangovar harakatlar qaytadan boshlandi. 30-yanvar, dushanba kuni yuz bergan o‘qqa tutishlar oqibatida Donetsk viloyatining Avdeyevka shahri yaqinidagi elektr uzatish liniyalari ishdan chiqqan va -15 daraja sovuq sharoitida shahar ahli elektr ta’minotisiz qolgan.
Ukraina hukumati va o‘zini mustaqil deb e’lon qilgan “Donetsk xalq respublikasi” ma’muriyati vaziyatning keskinlashuvida bir-birini ayblamoqda hamda shaxsiy tarkibidagi yo‘qotishlar soni bo‘yicha farqli ma’lumotlarni taqdim etmoqda.
Mazkur holat sabab, Ukraina prezidenti Pyotr Poroshenko Germaniyaga tashrifini to‘xtatishga majbur bo‘ldi va mamlakat diplomatlariga Avdeyevkadagi gumanitar inqiroz haqida BMT Xavfsizlik kengashi va Yevropada xavfsizlik va hamkorlik tashkilotini ogohlantirish haqida ko‘rsatma berdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)