БМТ Хавфсизлик кенгаши Украина шарқидаги вазият кескинлашувини 31 январь куни ёпиқ тартибда муҳокама қилади. Бу ҳақда, «Газета.ru» хабарига кўра, январь ойида кенгашга раислик қилаётган швециялик дипломат Олаф Скуг маълум қилган.
«Украина мамлакатдаги вазият юзасидан маслаҳат сўради», — дея маълум қилди Скуг.
Аввалроқ Украина президенти Пётр Порошенко мамлакат шарқидаги вазият кескинлашуви ҳақидаги масала муҳокамасини зудлик билан БМТ Хавфсизлик кенгаши эътиборига ҳавола қилиш ҳақида кўрсатма бергани маълум қилинган эди.
Эслатиб ўтамиз, Донбассдаги бўлиниш чизиғи бўйлаб жанговар ҳаракатлар қайтадан бошланди. 30 январь, душанба куни юз берган ўққа тутишлар оқибатида Донецк вилоятининг Авдеевка шаҳри яқинидаги электр узатиш линиялари ишдан чиққан ва -15 даража совуқ шароитида шаҳар аҳли электр таъминотисиз қолган.
Украина ҳукумати ва ўзини мустақил деб эълон қилган «Донецк халқ республикаси» маъмурияти вазиятнинг кескинлашувида бир-бирини айбламоқда ҳамда шахсий таркибидаги йўқотишлар сони бўйича фарқли маълумотларни тақдим этмоқда.
Мазкур ҳолат сабаб, Украина президенти Пётр Порошенко Германияга ташрифини тўхтатишга мажбур бўлди ва мамлакат дипломатларига Авдеевкадаги гуманитар инқироз ҳақида БМТ Хавфсизлик кенгаши ва Европада хавфсизлик ва ҳамкорлик ташкилотини огоҳлантириш ҳақида кўрсатма берди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)