“O‘zbekiston havo yo‘llari” milliy aviakompaniyasi bu yil bir qator yangi yo‘nalishlarni ochadi. Bu haqda kompaniya bosh direktori Valeriy Tyan ma’lum qildi, deb yozadi “Gazeta.uz”.
Tez orada Tojikiston bilan aviaqatnov qaytadan yo‘lga qo‘yiladi. “Hukumatlararo kelishuv to‘liq ishlab chiqildi va imzolashga tayyor. Dushanbega reys yaqin orada ishga tushadi”, — dedi Valeriy Tyan.
Nashr eslatishicha, Toshkent va Dushanbe o‘rtasidagi aviaqatnovni qayta tiklash haqidagi qaror 2016-yil noyabrida savdo-iqtisodiy hamkorlik bo‘yicha hukumatlararo komissiya majlisida qabul qilingan edi.
Aprel boshida yoki undan ham ertaroq Lahor (Pokiston)ga reys qayta ochiladi. Bundan tashqari, Hindistonga va Xitoyga yangi yo‘nalishlarni ishga tushirishga tayyorgarlik ko‘rilmoqda.
Valeriy Tyan qo‘shimcha qilishicha, aviakompaniya charter takliflarini kengaytirishni istiqbolli va manfaatli yo‘nalish deb hisoblaydi. Bu yil charterlar uchun ko‘proq havo kemalari ajratiladi.
2020-yilda poytaxt aeroportining “Toshkent-4” yangi yo‘lovchi terminali foydalanishga topshirilishi kerak. Bo‘lg‘usi terminal joylashadigan hududdan 540 ta uyda istiqomat qiluvchi 1400 ga yaqin oila boshqa joyga ko‘chiriladi. Ularning har biriga xonadon yoki yer maydoni beriladi.
Izoh (0)