«Ўзбекистон ҳаво йўллари» миллий авиакомпанияси бу йил бир қатор янги йўналишларни очади. Бу ҳақда компания бош директори Валерий Тян маълум қилди, деб ёзади «Газета.uz».
Тез орада Тожикистон билан авиақатнов қайтадан йўлга қўйилади. «Ҳукуматлараро келишув тўлиқ ишлаб чиқилди ва имзолашга тайёр. Душанбега рейс яқин орада ишга тушади», — деди Валерий Тян.
Нашр эслатишича, Тошкент ва Душанбе ўртасидаги авиақатновни қайта тиклаш ҳақидаги қарор 2016 йил ноябрида савдо-иқтисодий ҳамкорлик бўйича ҳукуматлараро комиссия мажлисида қабул қилинган эди.
Апрель бошида ёки ундан ҳам эртароқ Лаҳор (Покистон)га рейс қайта очилади. Бундан ташқари, Ҳиндистонга ва Хитойга янги йўналишларни ишга туширишга тайёргарлик кўрилмоқда.
Валерий Тян қўшимча қилишича, авиакомпания чартер таклифларини кенгайтиришни истиқболли ва манфаатли йўналиш деб ҳисоблайди. Бу йил чартерлар учун кўпроқ ҳаво кемалари ажратилади.
2020 йилда пойтахт аэропортининг «Тошкент-4» янги йўловчи терминали фойдаланишга топширилиши керак. Бўлғуси терминал жойлашадиган ҳудуддан 540 та уйда истиқомат қилувчи 1400 га яқин оила бошқа жойга кўчирилади. Уларнинг ҳар бирига хонадон ёки ер майдони берилади.
Изоҳ (0)