Toshkentdagi International Hotel Tashkent mehmonxonasida davom etayotgan media-haftalik doirasida 2017—2021-yillarda O‘zbekiston Respublikasini rivojlantirishning beshta ustuvor yo‘nalishi bo‘yicha Harakatlar strategiyasi loyihasida belgilangan mamlakatda ijtimoiy sohani yanada taraqqiy ettirish masalasi qizg‘in muhokama qilindi. Bu haqda O‘zA xabar berdi.
Prezident tashabbusi bilan ishlab chiqilgan mamlakatning kelgusi besh yillik taraqqiyotiga dasturilamal bo‘lishi mo‘ljallanayotgan Harakatlar strategiyasining hayotga tatbiq etilishi davlat va jamiyat rivojini yangi bosqichga ko‘taradi.
Ushbu muhim hujjat loyihasida mamlakatda ijtimoiy sohani yanada rivojlantirishning ustuvor yo‘nalishlariga alohida e’tibor qaratilgan. Unga ko‘ra yaqin kelajakda odamlarning bandligi va real daromadlarini bosqichma-bosqich oshirib borish, aholini ijtimoiy himoya qilish va sog‘liqni saqlash tizimini yanada takomillashtirish, zamonaviy, qulay va arzon uy-joylar qurish bo‘yicha maqsadli dasturlarni hayotga izchil tatbiq etish, yo‘l-transport, muhandislik-kommunikatsiya va ijtimoiy infratuzilmani modernizatsiya qilish, ta’lim va fan sohasini rivojlantirish, yoshlarga oid davlat siyosatini yanada boyitish bo‘yicha ko‘plab islohotlarni amalga oshirish ko‘zda tutilmoqda.
Aholining farovon hayotini ta’minlash maqsadida nafaqat eng kam oylik ish haqi, balki byudjet tashkilotlarida ham, xo‘jalik yurituvchi subyektlarda ham o‘rtacha ish haqi miqdori, pensiya, stipendiya va ijtimoiy nafaqalar hajmi bosqichma-bosqich ko‘paytirib boriladi.
2017-yilda mamlakat qishloq massivlarida 15 mingta arzon, zamonaviy, shinam uy-joy bunyod etiladi. Yangi qurilayotgan uy-joy massivlarida davlat resurslari hisobiga 415,3 kilometr suv, 291,5 kilometr elektr energiyasi, 316,9 kilometr gaz tarmoqlari, 260,3 kilometr yo‘llar, 134 ijtimoiy infratuzilma obyekti barpo etiladi.
2016—2020-yillarda mamlakat farmatsevtika sanoatini yanada rivojlantirish bo‘yicha chora-tadbirlar dasturiga muvofiq, yangi farmatsevtika korxonalarini tashkil etish va faoliyat ko‘rsatayotgan korxonalarni modernizatsiya qilishga doir 67 investitsiya loyihasi amalga oshirilmoqda. Bu aholi va tibbiyot muassasalarida ehtiyoj yuqori bo‘lgan import o‘rnini bosadigan dori-darmon vositalari va tibbiyot buyumlari ishlab chiqarishni 2,5 barobar oshirish imkonini beradi.
– Harakatlar strategiyasi loyihasida yangi ish o‘rinlari yaratish hamda aholining, avvalo, o‘rta maxsus va oliy o‘quv yurtlari bitiruvchilarining bandligini ta’minlash borasida qator takliflar ilgari surilgan, – deydi O‘zbekiston Respublikasi Mehnat vazirligi eksperti Botir Alimuhammedov. – Yoshlarni o‘quvchilik davridayoq kasb-hunar va tadbirkorlikka o‘rgatish, ularning amaliyot o‘tashini qat’iy tartibga solishdan tortib o‘z biznesini boshlashi uchun pul-kredit bilan ta’minlashgacha bo‘lgan jarayonni o‘z ichiga oluvchi yangi tizim ishlab chiqilmoqda. Zero, yoshlar ishli, hunarli bo‘lsa, ezgu maqsadlar tomon dadil qadam tashlaydi, mamlakatimiz taraqqiyoti ildamlayveradi.
Tadbirda soha mutaxassislari aholiga majburiy ijtimoiy kafolatlarni ta’minlash, ehtiyojmand qatlamni ijtimoiy himoyalashni kuchaytirish, sog‘liqni saqlash sohasini, jumladan, shoshilinch tibbiy yordam tizimini yanada isloh qilish, tibbiyot muassasalarining moddiy-texnik bazasini mustahkamlash yuzasidan berilgan savollarga javob qaytardi.
Izoh (0)