Xitoy Tashqi ishlar vazirligi vakili Xua Chunyinning ma’lum qilishicha, Xitoy tomonidan Rossiya chegarasi yaqiniga Dongfeng-41 (DF-41) qit’alararo ballistik raketalaridan iborat mobil komplekslarning joylashtirilgani haqidagi xabarlar — “internetda aylanib yurgan mish-mishlardan ortiq narsa emas”.
Xua Chunyinning qayd etishicha, Xitoy mazkur xabarlarga Kreml tomonidan “ijobiy munosabat” bildirilganiga e’tibor qaratgan. Avvalroq Rossiya prezidenti matbuot kotibi Dmitriy Peskov Xitoydagi harbiy taraqqiyotni Rossiya o‘ziga tahdid sifatida bilmasligini aytib o‘tgan edi.
24-yanvar kuni Xitoyning Global Times nashri, Gonkong va Tayvan ommaviy axborot vositalariga asoslanib, Rossiya bilan chegaradosh Xeylunszyan viloyatiga DF-41 ballistik raketalaridan iborat harakatlanuvchi komplekslar joylashtirilgani haqida xabar bergan edi.
E’tiborli tomoni, mazkur ballistik raketalarning Xitoy armiyasi tomonidan foydalanishga qabul qilingani haqida hozirga qadar rasmiy axborot berilgan emas.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)