AQSh poytaxti Vashingtonda “Grinpis”ning to‘qqiz faoli qurilish kraniga chiqib, “Resist” (“Qarshilik ko‘rsating”) deb yozilgan transparantni osib qo‘ydi. The Washington Post’ning yozishicha, faollarning ba’zilari o‘zini kranga zanjirband etgan.
Tashkilot rahbarlaridan biri Karen Topakianning so‘zlariga ko‘ra, mazkur norozilik aksiyasi AQSh prezidenti Donald Trampning joriy harakatlari va va’dalari bilan bog‘liq.
Xususan, faollar Trampning ekologik faollar qarshi chiqqan hududlarda neft quvurlarini qurish bo‘yicha taqiqni bekor qilish, shuningdek, abortlar bilan bog‘liq nodavlat tashkilotlarni moliyalashtirish taqiqlash haqidagi tashabbuslarga norozilik bildirmoqda.
Faollar “hujumi”ga uchragan kran Vashingtonning shimoli-g‘arbiy qismida, 15- va L ko‘chalar kesishmasida qad rostlagan; bu joy Oq uydan bir necha mavze naridadir.
Faollar mahalliy vaqt bilan 6:00 atrofida (Toshkent vaqti bilan 16:00 atrofida) kranga chiqib olgan. Aksiya transport tirbandliklariga sabab bo‘lgan. Hodisa joyiga politsiya xodimlari va qutqaruvchilar yetib kelgan, biroq ular jarayonga aralashmayapti.
Politsiya vakillarining so‘zlariga ko‘ra, ular “har bir fuqaroning norozilik bildirish huquqini hurmat qiladi”, biroq mazkur faollarning harakatini “oliy darajada xavfli va noqonuniy” deb hisoblaydi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)