AQSh prezidenti Donald Tramp Amerika—Meksika chegarasidagi devor qurilishi “yaqin oylar ichida” boshlanishini ma’lum qildi. “RBK”ning yozishicha, bu haqda u ABC News telekanaliga bergan intervyusida aytib o‘tgan.
Trampning yana bir karra qayd etishicha, devor qurilishi uchun pulni Meksika to‘laydi hamda AQSh va Meksikaning bu boradagi muzokaralari “juda tez orada” bo‘lib o‘tadi. Trampning bayon etishicha, Meksika devorni qurish bo‘yicha AQSh xarajatlarini “100 foiz” qoplab beradi.
AQSh prezidentining tasdiqlashicha, qurilishning dastlabki bosqichi amerikalik soliq to‘lovchilar tomonidan moliyalashtiriladi, biroq bu pullar o‘rni AQSh keyinroq Meksikadan oladigan mablag‘lar hisobiga to‘ldiriladi.
“Men sizga aytyapman, ular to‘laydi. Balki bu oson bo‘lmas. Men qilayotgan ish AQSh uchun yaxshi, Meksika uchun ham yaxshi bo‘ladi. Biz Meksika barqaror va juda mustahkam bo‘lishini istaymiz”, — dedi Tramp.
Meksika va AQSh o‘rtasida devor qurish rejalari haqida Tramp o‘z saylovoldi kampaniyasi vaqtidayoq ma’lum qilgan. Uning so‘zlariga ko‘ra, bu Meksikadan AQShga kelayotgan noqonuniy muhojirlar oqimini kamaytirishga yordam beradi.
Yanvar boshida Tramp devor qurilishi bo‘yicha barcha xarajatlar Meksika tomonidan qoplanishini ma’lum qilgan edi. Bunga javoban, Meksika prezidenti Enrike Penya Nyeto devor uchun Meksika pul to‘lamasligini bildirdi.
Avvalroq CNN telekanali, AQSh Kongressining vakillar palatasidagi manbalarga asoslanib, Tramp devor qurilishi uchun mablag‘ni federal byudjetdan so‘rab olishi mumkinligi haqida xabar bergan edi.
Buning uchun u Meksika va AQSh o‘rtasida devor qurilishini ko‘zda tutuvchi 2006-yilda qabul qilingan qonundan foydalanishi mumkin — ushbu qonun o‘sha vaqtda moliyalashtirishning yetarli emasligi sabab bajarilmagan.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)