АҚШ пойтахти Вашингтонда «Гринпис»нинг тўққиз фаоли қурилиш кранига чиқиб, «Resist» («Қаршилик кўрсатинг») деб ёзилган транспарантни осиб қўйди. The Washington Post’нинг ёзишича, фаолларнинг баъзилари ўзини кранга занжирбанд этган.
Ташкилот раҳбарларидан бири Карен Топакианнинг сўзларига кўра, мазкур норозилик акцияси АҚШ президенти Дональд Трампнинг жорий ҳаракатлари ва ваъдалари билан боғлиқ.
Хусусан, фаоллар Трампнинг экологик фаоллар қарши чиққан ҳудудларда нефть қувурларини қуриш бўйича тақиқни бекор қилиш, шунингдек, абортлар билан боғлиқ нодавлат ташкилотларни молиялаштириш тақиқлаш ҳақидаги ташаббусларга норозилик билдирмоқда.
Фаоллар «ҳужуми»га учраган кран Вашингтоннинг шимоли-ғарбий қисмида, 15- ва Л кўчалар кесишмасида қад ростлаган; бу жой Оқ уйдан бир неча мавзе наридадир.
Фаоллар маҳаллий вақт билан 6:00 атрофида (Тошкент вақти билан 16:00 атрофида) кранга чиқиб олган. Акция транспорт тирбандликларига сабаб бўлган. Ҳодиса жойига полиция ходимлари ва қутқарувчилар етиб келган, бироқ улар жараёнга аралашмаяпти.
Полиция вакилларининг сўзларига кўра, улар «ҳар бир фуқаронинг норозилик билдириш ҳуқуқини ҳурмат қилади», бироқ мазкур фаолларнинг ҳаракатини «олий даражада хавфли ва ноқонуний» деб ҳисоблайди.
Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.
Изоҳ (0)