GM Uzbekistan faoliyatiga zamonaviy AKTni tatbiq etishni rivojlantirish bo‘yicha hamkorlik boshlandi

2017-yilning 23-yanvar kuni Toshkent shahrida GM Uzbekistan AJ, Uzinfocom Kompyuter va axborot texnologiyalarini rivojlantirish va joriy etish markazi, Toshkent shahridagi Inha universiteti, Toshkent axborot texnologiyalari universiteti hamda Toshkent shahridagi Turin politexnika universiteti o‘rtasida o‘zaro anglashuv to‘g‘risida Memorandum imzolandi. Bu haqda Inha universiteti matbuot xizmati xabar berdi.

Memorandum eng avvalo GM Uzbekistan faoliyatida zamonaviy axborot kommunikatsiya texnologiyalarini tatbiq etishni rivojlantirish masalalaridagi hamkorlikni, avtomobil sotuvi hamda sotuvdan keyingi xizmat ko‘rsatish bilan bog‘liq, shuningdek, aholi va tadbirkorlik subyektlari uchun interaktiv onlayn-xizmatlarni joriy etish bo‘yicha loyihani amalga oshirishni nazarda tutadi. Mazkur hamkorlik GM Uzbekistan’ga innovatsion yechimlarni tatbiq etish orqali taqdim etilayotgan xizmatlar sifatini oshirish hamda mijozlarga xizmat ko‘rsatishdagi mavjud bo‘lgan muammolarni bartaraf etish imkonini beradi.

Jumladan, tomonlar GM Uzbekistan avtomobillarining xaridorlari kompaniyaning rasmiy dilerlari va xizmat ko‘rsatish markazlarini osonlik bilan topishlari, shuningdek, xizmat ko‘rsatish sifati hamda mavjud bo‘lgan muammolar to‘g‘risida o‘z mulohazalarini qoldirish va bosqichma-bosqich onlayn-sotuvlar tizimini tashkil etish imkoniyatini beruvchi maxsus loyihani ishlab chiqib, joriy etishni rejalashtirmoqda.

Hamkorlikning ajralmas yo‘nalishlaridan biri jamoatchilik bilan aloqalarni kuchaytirish bo‘ladi. GM Uzbekistan ishlab chiqarilayotgan mahsulot sifatini yaxshilash bo‘yicha qator loyihalarni amalga oshirmoqda, ammo jamoatchilik har doim ham olib borilayotgan ishlar to‘g‘risida xabardor emas. Mazkur hamkorlik doirasida tomonlar mahsulot sifatini yaxshilash bo‘yicha olib borilayotgan ishlar va umuman GM Uzbekistan faoliyati to‘g‘risida yakundagi iste’molchilarni xabardor qilish maqsadida muloqotni yo‘lga qo‘yadi.

Qayd etib o‘tamiz, memorandum doirasidagi mazkur loyihalarni amalga oshirish uchun yuqorida nomlari keltirilgan universitetlarning talabalari jalb etiladi. Hamkorlikning birinchi bosqichida talabalar malaka oshiruvchilar tarzida jalb etiladi, amaliyot yakunlariga ko‘ra eng munosib talabalar GM Uzbekistan kompaniyasiga ishga taklif etiladi.