O‘zbekiston TIV hay’ati majlisida vazirlik apparati, xorijdagi elchixonalar, konsullik muassasalari va doimiy vakolatxonalar ishiga tanqidiy baho berildi

O‘zbekiston Respublikasi Tashqi ishlar vazirligi hay’atining kengaytirilgan majlisi bo‘lib o‘tdi. Bu haqda vazirlik matbuot xizmati xabar bermoqda.

Tashqi ishlar vaziri Abdulaziz Kamilov olib borgan majlisda O‘zbekiston Respublikasi Prezidenti Shavkat Mirziyoyevning Vazirlar Mahkamasi kengaytirilgan majlisidagi ma’ruzasida belgilangan topshiriqlar nuqtai nazaridan TIV markaziy apparati va xorijdagi muassasalar faoliyati har tomonlama tahlil qilindi.

Uchrashuvda vazirlik apparati, O‘zbekistonning chet davlatlardagi elchixonalari, xalqaro tashkilotlardagi doimiy vakolatxonalari, konsullik muassasalari ishiga tanqidiy baho berildi. O‘zbekiston Respublikasi Prezidentining “O‘zbekiston Respublikasining xorijdagi diplomatik vakolatxonalari va xorijiy mamlakatlar bilan ikki tomonlama hamkorlik bo‘yicha hukumatlararo komissiyalar (qo‘mitalar va kengashlar) faoliyatini yanada takomillashtirish bo‘yicha qo‘shimcha chora-tadbirlar to‘g‘risida”gi qarorini ijro etish choralari belgilandi.

Majlis ishida O‘zbekiston Respublikasi Oliy Majlisi Senati raisining birinchi o‘rinbosari Sodiq Safoyev ishtirok etdi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.