Ўзбекистон ТИВ ҳайъати мажлисида вазирлик аппарати, хориждаги элчихоналар, консуллик муассасалари ва доимий ваколатхоналар ишига танқидий баҳо берилди

Ўзбекистон Республикаси Ташқи ишлар вазирлиги ҳайъатининг кенгайтирилган мажлиси бўлиб ўтди. Бу ҳақда вазирлик матбуот хизмати хабар бермоқда.

Ташқи ишлар вазири Абдулазиз Камилов олиб борган мажлисда Ўзбекистон Республикаси Президенти Шавкат Мирзиёевнинг Вазирлар Маҳкамаси кенгайтирилган мажлисидаги маърузасида белгиланган топшириқлар нуқтаи назаридан ТИВ марказий аппарати ва хориждаги муассасалар фаолияти ҳар томонлама таҳлил қилинди.

Учрашувда вазирлик аппарати, Ўзбекистоннинг чет давлатлардаги элчихоналари, халқаро ташкилотлардаги доимий ваколатхоналари, консуллик муассасалари ишига танқидий баҳо берилди. Ўзбекистон Республикаси Президентининг «Ўзбекистон Республикасининг хориждаги дипломатик ваколатхоналари ва хорижий мамлакатлар билан икки томонлама ҳамкорлик бўйича ҳукуматлараро комиссиялар (қўмиталар ва кенгашлар) фаолиятини янада такомиллаштириш бўйича қўшимча чора-тадбирлар тўғрисида»ги қарорини ижро этиш чоралари белгиланди.

Мажлис ишида Ўзбекистон Республикаси Олий Мажлиси Сенати раисининг биринчи ўринбосари Содиқ Сафоев иштирок этди.

Диққат, диққат! «Дарё»нинг Telegram’даги расмий канали — «Toshqin ‘Daryo’» (@toshqindaryo)га обуна бўлиб, янгиликлардан овозли кўринишда баҳраманд бўлишингиз мумкин.