AQShning Ogayo shtati Kolumbus shahrida joylashgan hayvonot bog‘ida dunyodagi eng qari gorilla vafot etdi, deb xabar beradi Reuters.
2016-yil dekabr oyi boshida gorilla miyasida mavjud bo‘lgan o‘simta olib tashlanadi. Hayvonot bog‘idagilarning ta’kidlashicha, gorilla ancha sog‘ayib qolgan edi. Shu sababdan uning o‘limi kutilmagan hol deb qabul qilindi. Gorilla o‘limidan oldin, hayvonot bog‘i tashrif buyuruvchilarga ko‘rinish berib, ular bilan “muloqot”da bo‘lgan. O‘lim sabablari hozirgacha ma’lum qilinmagan.
G‘arb tekisliklari gorillasi turiga kiruvchi Kolo laqabli gorilla Kolumbus shahridagi hayvonot bog‘ida 1956-yil 22-dekabrda dunyoga kelgan.
Hayvonot bog‘i xodimlari unga xuddi o‘z farzandlaridek munosabatda bo‘lib, kiyimlar va sut mahsulotlari bilan siylab turgan. Gorilla tutqunlikda 3 ta farzandni dunyoga keltirgan.
Bu turdagi gorillalarning o‘rtacha umri 40 yilga teng. Hayvonot bog‘ida esa ular 50 yilgacha umr kechirishi mumkin.
Ma’lumot uchun, dunyoning avvalgi ushbu turdagi eng qari gorillasi Jenni laqabli gorilla bo‘lib, u Dallasdagi hayvonot bog‘ida 2008-yilda 55 yoshda vafot etgan edi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)