“Har bir mavzega — bittadan mushuk uyi”. Mushuksevar istanbulliklar “kichik do‘stlari”ni sovuqdan asrashga harakat qilmoqda

Turkiyada havo haroratining keskin pasayib ketgani munosabati bilan, Istanbul rasmiylari shahar mushuklari uchun ommaviy ravishda boshpana qurishni boshladi, deya xabar bermoqda “TASS”.

Istanbulda havo haroratining Selsiy shkalasi bo‘yicha -5 daraja sovuqgacha pasayishi, shaharda bir hafta davom etgan qor bo‘roni nafaqat aholining, balki ularning “kichik do’stlari”ning hayotini ham qiyin ahvolga solib qo‘ydi. Tashkil etilayotgan “mushuk uylari”da jonivorlarga oziq-ovqat ham beriladi.

Hayvonlarni muhofaza qilish mavzusi nafaqat rasmiylarni xavotirga solmoqda, balki ijtimoiy tarmoqlarda muhokama qilinayotgan mavzular reytingida birinchilardan bo‘lib turibdi. Istanbul mushuklari sovuqda muzlab qolmasligi va och qolmasligi uchun odamlar hamma joyda vaqtinchalik boshpanalar qurib, ularga oziq-ovqat keltirmoqda.

“Har bir mavzega — bittadan mushuk uyi” tashabbusi bilan chiqish qilgan Istanbulning Buyukchekmedja tumani ma’muriyati bu borada ayniqsa faol ish olib bormoqda. Mahalliy ma’muriyat rahbari Hasan Akgyunning so‘zlariga ko‘ra, unga tegishli hududda 5000 daydi mushukka mo‘ljallangan qabul markazini ishga tushirish rejalashtirilgan.

Kadiko‘y tumanida esa har yilgidek, an’anaviy “Daydi mushuklar festivali” o‘tkaziladi — u yerda mushuklar uchun boshpanalar qurilishiga maktab o‘quvchilari jalb qilinadi.

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.