2017-yil 16-yanvarda Qirg‘iziston poytaxti Bishkekdagi “Manas” aeroportidan 2 kilometr narida joylashgan qishloq ustiga ACT Airlines kompaniyasiga qarashli Boeing 747-400 yuk samolyoti quladi. Oxirgi ma’lumotlarga qaraganda, ushbu fojia oqibatida 35 kishi, shu jumladan, to‘rt nafar ekipaj a’zosi halok bo‘ldi, qishloqda joylashgan dala hovlilarning yarmi vayron bo‘ldi. Mamlakatda motam e’lon qilindi.
Ushbu voqea munosabati bilan Qirg‘izistonning “AKIpress” agentligi mamlakatda 2000-yildan buyon ro‘y bergan eng yirik aviahalokatlarni yodga oldi.
2015-yil 22-noyabrida O‘sh shahri aeroportida Boeing-737 qattiq qo‘nishi oqibatida shassi va qanoti sinib ketdi. Qo‘nish ob-havo yomon bir paytda tunda amalga oshirilayotgani bois halokat sodir bo‘ldi. Bir necha soat muqaddam samolyot O‘shda qo‘na olmay, Bishkekka yo‘l olgan, so‘ng yana O‘shga qaytgan edi. Shassi buzilishi oqibatida bort qo‘nish tasmasidan chiqib ketdi. Shuningdek, havo kemasi fyuzelyajidan 1,5 metr naridan qanoti uzilib ketdi.
Bortda bo‘lgan 159 kishi omon qoldi.
2014-yil 18-iyulida Xontangri tog‘i yonbag‘rida Mi-8 vertolyoti halokatga uchradi. Qirg‘iziston mudofaa vazirligiga tegishli apparat rossiyalik alpinistni evakuatsiya qilish chog‘ida quladi. Voqea dengiz sathidan 5200 metr balandlikda ro‘y berdi.
Hech kim jabr ko‘rmadi.
2013-yil 24-mayida Jalolobod viloyatining Aqsi tumanida An-2 elektr uzatish liniyasiga tegib ketishi oqibatida uch kishi halok bo‘ldi.
O‘sha kuni Valor Air aviakompaniyasiga tegishli samolyot Aqsi tumanida kimyoviy ishlarni amalga oshirayotgan edi. Tog‘ yonbag‘riga kimyoviy ishlov berish chog‘ida 15 metr balandlikda samolyot elektr uzatish liniyalariga tegib ketib, quladi va o‘t oldi.
Bortda bo‘lgan ikki ekipaj a’zosi va yo‘lovchi halok bo‘ldi.
2013-yil 3-mayida AQSh harbiy-havo kuchlarining yoqilg‘i quyuvchi samolyoti — KC-135 Stratotanker halokatga uchradi. “Manas” aeroportidan uchib chiqqan bort janubga qayrilayotganida tezlikni va balandlikni yo‘qota boshladi, buning natijasida havoda portlash ro‘y berdi. Samolyot uchta yirik bo‘lakka ajralib ketdi. Ekipajning uch nafar a’zosi halok bo‘ldi.
2011-yil 28-dekabrida O‘sh aeroportida Tu-134 samolyoti qo‘nish chog‘ida halokatga uchradi.
Ob-havo va ko‘rish sharoitlari yomon edi. Qattiq qo‘nish paytida shassi bilan birga samolyotning o‘ng qanoti uzilib tushdi, apparat qo‘nish tasmasidan chiqib ketib, ag‘darildi, so‘ng o‘t oldi. 82 yo‘lovchi (69 yoshi katta kishi, to‘rt bola va to‘qqiz ko‘krakdan chiqmagan go‘dak) hamda olti nafar ekipaj a’zosi samolyotni tark etib, tirik qoldi. 26 kishiga tibbiy yordam kerak bo‘ldi.
Samolyot butunlay yonib ketdi.
2008-yil 24-avgustida “Manas” aeroporti yaqinidagi Jangajer qishlog‘ida “Itek-Eyr” aviakompaniyasining Bishkek-Tehron reysini amalga oshirayotgan Boeing-737-200 samolyoti aeroportga 9 kilometr qolganda quladi. 65 kishi halok bo‘ldi, 25 kishi tirik qoldi.
2007-yil 23-iyunida Norin viloyatida Yak-40 samolyoti yerga qo‘nishga majbur bo‘ldi.
Mamlakat aviakorxonalari rahbarlarini olib ketayotgan samolyotning ikki dvigateli parvoz chog‘i ishdan chiqdi, shu bois uchuvchilar uni Qoraqujur darasida qo‘ndirishga majbur bo‘ldi. Ammo shassi chiqmay qolgani bois samolyot o‘t oldi. To‘qqiz nafar oliy martabali yo‘lovchi va besh nafar ekipaj a’zosi samolyotni tark etishga ulgurdi.
2006-yil 26-sentabrida “Manas” aeroportida Tu-154 samolyoti AQSh HHKning KC-135 samolyoti bilan to‘qnashib ketdi. Tu-154 qanotining bir qismi uzilib tushdi.
Ikki havo kemasi ekipaji a’zolari va 52 nafar yo‘lovchi omon qoldi.
2005-yil 6-avgustida FVVga qarashli Mi-8 vertolyoti Issiqko‘l viloyatida “Janubiy Enilchek” alpinistlar lageridan ko‘tarilishda halokatga uchradi.
Vertolyot turistlarni olib ketishi kerak edi. 17 turist va to‘rt nafar ekipaj a’zosi bortni tark etishga ulgurdi. Vertolyot butunlay yonib ketdi.
2004-yil 4-noyabrida Niderlandiya HHKning F-16 Falcon qiruvchisi “Manas” aeroportida favqulodda qo‘nishga majbur bo‘ldi.
Qo‘nishdan so‘ng samolyotning shassi gidravlikasi ishdan chiqdi, shundan so‘ng u tasmadan chiqib ketdi. Uchuvchiga ziyon yetmadi.
2004-yil 15-martida Otboshi tumanida qor ko‘chkisida qolib ketgan ovchilar guruhini evakuatsiya qilish uchun yuborilgan FVVning Mi-8 vertolyoti halokatga uchradi. Bortga 20 kishi, shu jumladan, uch nafar AQSh va Kanada fuqarosini olgan vertolyot havoda o‘zini ushlab turolmay quladi. Ikki kishi halok bo‘ldi.
Vertolyot yonib ketdi.
2002-yil 17-dekabrida “Manas” aeroportida Norvegiya HHKning F-16 Falcon qiruvchisi favqulodda qo‘nishni amalga oshirdi.
Samolyot qattiq ko‘ngani bois orqa shassi uzilib tushdi, va u qornida bir necha o‘n metr yurdi. Uchuvchiga ziyon yetmadi.
2002-yil 23-oktabrida “Manas” aeroportida Il-62 yuk samolyoti halokatga uchradi.
Moskva–Bishkek reysini amalga oshirayotgan, “Tretyakovo” aviakompaniyasiga tegishli bort uchish-qo‘nish tasmasidan chiqib ketib, to‘siqqa urildi va o‘t oldi. Bortda bo‘lgan sakkiz nafar ekipaj a’zosi chiqib olishga ulgurdi.
Samolyot butunlay yonib ketdi.
2000-yil15-martida Norin viloyatining Otboshi tumanida Mi-8 vertolyoti qoyaga urilib quladi.
Vertolyot bir guruh ovchilarni olib ketishga kelgan edi. Ammo ob-havo yomonligi tufayli vertolyot dumi qoyaga tegib ketdi. Uch kishi, shu jumladan, parlament deputati Erkinbek Matiyev halok bo‘ldi, to‘rt kishi jarohat oldi.
Vertolyot butunlay yonib ketdi.
Izoh (0)