Ochiq dengizda 27 kun: Yangi zelandiyalik erkak qizi bilan buzilgan qayiqda Avstraliyagacha suzib bordi

Yangi zelandiyalik Alan Lengdon o‘zining olti yashar qizi Key bilan qariyb bir oy davomida ochiq dengizda o‘zining olti metrli buzilgan qayig‘ida qolib ketdi va Tasman dengizini kesib o‘tib, Avstraliyaga yetib kelishga muvaffaq bo‘ldi. Bu haqida RNZ’ga tayanib TJournal xabar bergan.

Lengdon va uning qizi Yangi Zelandiyadagi Koxiya portidan 17-dekabr kuni yo‘lga chiqgan. Uning aytishiga ko‘ra, u mamlakatning shimoli-sharqida joylashgan Bey-of-Aylends bo‘g‘ozigacha borishni rejalashtirgan, biroq sayohat boshlanganidan ko‘p o‘tmay dovul boshlangan va katamaran rullaridan biri sinib ketgan hamda uni boshqarib bo‘lmay qolgan.

Lengdon quruqlik bilan aloqaga chiqa olmagan, shuning uchun sayohat boshlanganidan to‘rt kun o‘tib qizchaning onasi, Lengdondan alohida yashovchi Ariana Vayler ularning yo‘qolganini ma’lum qilgan. Shundan so‘ng rasmiylar katamaranni qidirishni boshlagan va bu haqida Interpolni xabardor qilgan. Bu vaqtgacha ota o‘z qizi bilan 2600 kilometr masofani bosib o‘tgandi.

Qayiqni Avstraliya tomonga yo‘naltirish fikri Lengdonga Yangi yilni qizi bilan qayiqda nishonlagandan so‘ng kelgan.

Avstraliya qirg‘oqlariga yetib borishimizni va ichimlik suvimiz yetarliligini bilardim. Gap faqat vaqt masalasida edi va men jarayonni tezlashtirishni xohlamadim.

Alan Lengdon

Sayohat davomida ota va qiz oziq-ovqat hamda suv masalasida muammoga duch kelmagan, tajribali dengiz sayohatchisi bo‘lgan Alan oldindan har ehtimolga qarshi yetarlicha zaxirani g‘amlab qo‘ygan edi. Shu tufayli ota-bola 2017-yil 10-yanvar kuni Sidneydan 230 kilometr uzoqlikda joylashgan Ulladulla portiga suzib kelishga muvaffaq bo‘ldi.

Lengdon qizi bilan dengizda bo‘lgan paytda qizchaning onasi Ariana Vayler bolalar reabilitatsiyasi bo‘yicha Avstraliyadan mutaxassis yollagan. Bu mutaxassis ham yo‘qolgan ota va qizni izlagan va Lengdon Avstraliyaga suzib kelishga qaror qilgan bo‘lishi mumkin, deb taxmin qilgan.

Avvalroq Vayler bu mutaxassisni Lengdon o‘z qizi bilan bir yil davomida Yangi Zelandiyadagi qishloqda yashagani uchun yollagan edi. Ayol ham Lengdon Avstraliyaga yo‘l olishi mumkin, deb hisoblagan.

U dengizni biladi, shamolni tushunadi, unga bu narsalar tanish. U juda malakali inson. Muammoli vaziyatlardan qanday chiqib ketishni yaxshi biladi.

Ariana Vayler, Key Lengdonning onasi

Yo‘qolgan ota va qizning Avstraliyaga yetib kelganligi ma’lum bo‘lganda, Vayler qidiruv ishlari uchun rasmiylarga minnatdorchilik bildirdi. Biroq ayol tomonidan yollangan bolalar reabilitatsiyasi bo‘yicha mutaxassis Lengdon Avstraliya hududiga noqonuniy ravishda kirgani uchun sud oldida javob berishi kerakligini aytgan. Ikki mamlakat rasmiylari vaziyatni o‘rganib chiqib, Lengdonga nisbatan ayblov e’lon qilib ishni sudga oshirish kerak yoki yo‘qligini hal qilishga va’da bergan.

Nelsonlik tajribali yaxtachi Alan Patti Lengdon va qizining katamarandagi sayohati yuzasidan izoh bergan. Uning qayd etishicha, Lengdonning katamarani mustahkam materialdan yasalgan va Yangi Zelandiyadan Avstraliyagacha suzib kelishi mumkin bo‘lgan. Biroq u Lengdonning sayohatga o‘zi bilan yosh bolani olganligini ma’qullamagan.

Aytishim mumkinki, ob-havo (sayohat paytida) haqiqatan ham yomon bo‘lgan, biroq buni aniq tasdiqlab bo‘lmaydi. Shubhasiz, u professional dengizchi, biroq o‘zi bilan olti yoshli bolani olib telbalarcha ish tutgan.

Alan Patti, yaxtachi

Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.