Ta’tildan qaytib kelgan La liga klublari 2017-yilgi mavsumni boshlab yubordi. Avvaliga Ispaniya kubogi, ketidan esa chempionatning 17-turi.
“Real Madrid”
Zidan Madrid klubini qabul qilib olganiga 4-yanvar kuni 1 yil to‘lgandi. Bu vaqt ichida jamoa o‘sishga erishdi.
“Sports.ru” xabariga ko‘ra, “Real” ispan klublarining eng uzoq davom etgan mag‘lubiyatsiz seriyasi bo‘yicha rekordni takrorladi. Mana 39 ta o‘yindirki, Zidan shogirdlarini hech kim mag‘lub eta olmaydi.
Ma’lumot uchun, 2015-yilgi mavsumda “Barselona” ketma-ket 39 ta o‘yinda mag‘lub bo‘lmay, Ispaniya rekordini o‘rnatgandi. Takrorlangan rekordni yangilash uchun “Real”ga yana 1 ta uchrashuvda mag‘lub bo‘lmaslik kifoya. Navbatdagi uchrashuvni “Qirollik klubi” 15-yanvar kuni “Sevilya” maydonida o‘tkazadi.
Karim Benzema
“Granada” darvozasiga gol urgan fransiyalik hujumchi “Real” to‘purarlari orasida 8-o‘ringa ko‘tarilib oldi. 2009-yilning yozida Madridga ko‘chib o‘tgan Benzema o‘tgan davr mobaynida “Real” sharafini 338 o‘yinda himoya qildi va 172 ta gol urdi. Shuningdek, 80 ta golli uzatma berdi.
“Real” to‘purarlari orasida 7-o‘rin Fransisko Xentoga tegishli bo‘lib, uning hisobida 182 ta gol bor.
Karim Benzema La ligaga tashrif buyurganidan buyon eng ko‘p aynan “Granada” darvozasini ishg‘ol qilgan — 10 bor.
Krishtianu Ronaldu
“Real” klubi ustozi Zinedin Zidan Krishtianu Ronalduga imkoniyat nima sababdan kam berilayotganiga izoh berdi.
Biz Ronaldu bilan rotatsiya masalasida kelishib oldik. Matbuot uning naqadar kerakli futbolchi ekanini tushunishi kerak. Men Ronaldu butun mavsum davomida yaxshi formada bo‘lishini istayman.70 kun ichida 20 ta o‘yin o‘tkazish bu dahshat. Unga dam kerak va buni uning o‘zi ham tushundi, oramizda hech qanday muammo yo‘q.
Zinedin Zidan, “Real Madrid” bosh murabbiyi
“Barselona”
2017-yil “Barselona” uchun tahlikali boshlandi. Avvaliga Ispaniya kubogida “Atletik”dan mag‘lubiyat, keyin esa La ligada “Vilyarreal” Kataloniya klubidan ochko tortib oldi.
Bruno Soriano jarima maydonchasida to‘pni ikki bor qo‘li bilan o‘ynadi. Men Maskeranoning qo‘liga to‘p tekkanini ham ko‘rdim, biroq bu qasddan emasdi. O‘zingiz ko‘rib turibsiz, hakamlar har o‘yindan keyin o‘zi uchun gap tilab olmoqda.Pike “Atletik”ka qarshi o‘yindagi muvaffaqiyatsizlikdan keyin ham hakamlarni ayblagandi. Vaholanki o‘sha uchrashuvda referi “Atletik”ning ikki futbolchisini maydondan chetlatgandi.Umumiy planda biz “Vilyarreal”dan yaxshiroq o‘ynadik. Chempionat hali boy berilmadi. Nimanidir o‘zgartirish evaziga vaziyatni o‘nglab, bosh sovrinni yutib olishimizga ishonaman.
Men uchrashuvni televizor orqali tomosha qildim. Bruno Soriano to‘pni qo‘li bilan o‘ynagani takroriy lavhalar orqali yaqqol ko‘rindi. Hakamlarga videotakrorlar orqali yordam berish kerak.“Vilyarreal”ga bo‘lgan hurmatni saqlagan holda aytaman: biz zafar quchishga haqliroq edik. Messi, Neymar va Suares ta’tilga chiqmagandek o‘ynadi. Biroq g‘alaba goli urilmagani uchun ularni ayblab bo‘lmaydi.
Hordi Mestre, “Barselona” vitse-prezidenti
“Valensiya”
Chezare Prandellini saqlab qola olmagan “Valensiya” La ligada jon saqlab qolish uchun bor g‘ayratini ishga solmoqda. Yaqindagina jamoa “Qozog‘iston”ning “Astana” klubida to‘p surayotgan Nemanya Maksimovich bilan 2021-yilning yoziga qadar mo‘ljallangan shartnoma imzoladi.
Serbiyalik 21 yoshli futbolchining “Astana” bilan shartnomasi 2017-yilning yoziga qadar mo‘ljallangandi. Shu boisdan “Valensiya” qozog‘istonliklar hisob raqamiga 300 ming yevro o‘tkazib beradi.
“Vilyarreal”
“Barselona”dan ochko tortib olishga muvaffaq bo‘lgan jamoa uy stadioni nomini o‘zgartirishga qaror qildi. Bunga qadar “El Madrigal” nomi bilan tanilgan o‘yingoh, endilikda “Estadio de la Seramika” deb yuritiladi.
Bundan buyon stadion keramogranitdan ishlangan qoplagich yordamida “Vilyarreal”ning asosiy libosi bo‘lgan sariq tusga kirib turadi. Yana bir necha kundan keyin klub muzeyi ishga tushadi. Stadion to‘liq rekonstruksiyadan chiqishi uchun esa yana 3—4 yil vaqt kerak bo‘ladi.
Klub stadionni ta’mirlash ishlariga qarashayotgan barcha — 7 kompniya nomini kirish qismiga yozib qo‘ydi.
Antuan Grizmann
“Eybar”ga qarshi bellashuvning 72-daqiqasida gol urgan fransiyalik hujumchi Antuan Grizmann La liga doirasida 843 daqiqadan buyon davom etib kelayotgan golsiz seriyasiga yakun yasadi.
Grizmann kubok bellashuvlarida gol urayotgani bilan, La ligada so‘nggi bor 2-oktabr kuni “Valensiya” darvozasiga yo‘l topgan bo‘lib, keyingi 9 ta bellashuvda maydonni golsiz tark etgandi.
Sami Nasri
Fransiya terma jamoasiga chaqirilmaydigan, “Manchester Siti”da qadr topgan Samir Nasri o‘zini “Sevilya” safida baxtli his qilayotgandi. Ayni vaqtda esa unga 4 yillik diskvalifikatsiya tahdid solmoqda.
Nasri Los-Anjelesga tashrif buyurib, ichini yuvdirgan. Bu esa WADA tomonidan doping tekshiruvidan “omon chiqish uchun” deb qaraldi. Sportchilar bunday amaliyotni o‘zida qo‘llash uchun birinchi navbatda maxsus ruxsatnoma olishi kerak edi. Nasri esa bunday qilmagan.
Reglamentga ko‘ra, bunday holatda sportchi 4 yilga sportdan chetlatiladi. Agar Nasri bu jarayon aslida nima uchun ekanini ishonarli dalillar bilan isbotlay olsa, uning chetlatilish muddati biroz kamaytirilishi mumkin.
Izoh (0)