O‘zbekiston milliy terma jamoasi sardori Odil Ahmedov Xitoyning “Shanxay SIPG” klubi qiziqishlari doirasiga kirdi. Bu haqda “Futbol Kulichki” “Krasnodar” bosh direktori Vladimir Xashigning “Match-TV”ga bergan intervyusiga asoslanib ma’lumot berdi.
“Shanxay SIPG”dan oldinroq Ahmedov bilan Xitoyning boshqa bir klubi “Shandong Luneng” qiziqayotgan bo‘lib, u “Krasnodar” hisob-raqamiga 8 million yevro o‘tkazib berishi kutilayotgandi.
“Shanxay SIPG” 2016-yilgi mavsumda Osiyo futbol klublari uchun rekord bo‘lgan summaga Xalk va Oskarni sotib olgandi. Xalkning orqasidan “Zenit” 55,8 million yevro ishlab olgan bo‘lsa, Oskarni olib kelish uchun xitoyliklar 70,5 million chiqim qilgandi.
Ma’lumot uchun, “Shanxay SIPG” klubini portugaliyalik mutaxassis Andre Villash-Boash boshqaradi. Uning qo‘l ostida Xalk va Oskardan tashqari yana bir braziliyalik Elkesen, shuningdek, argentinalik Dario Konka, ivuarlik Jan Evrard Kuassi, Janubiy Koreyadan Kim Ju Yung bor.
Xitoy Super Ligasida legioner futbolchilar cheklovi bor bo‘lib, unga ko‘ra 5 nafar xorijlik futbolchi bilan shartnoma tuzish mumkin. Shularning hech bo‘lmaganda 1 nafari albatta osiyolik bo‘lishi kerak.
Qayd etish kerak, Andre Villash-Boash Odil Ahmedov harakat qiladigan Rossiya Premyer-Ligasida ishlab, “Zenit” klubiga ustozlik qilgandi. Bu esa mutaxassis Ahmedovning imkoniyatlarini bilishini bildiradi.
Odil Ahmedovni O‘zbekiston Oliy Ligasida faoliyat olib borayotgan murabbiylar va klub sardorlari 2016-yilning mamlakatdagi eng yaxshi futbolchisi deb topgandi.
Izoh (0)