Ўзбекистон миллий терма жамоаси сардори Одил Аҳмедов Хитойнинг «Шанхай SIPG» клуби қизиқишлари доирасига кирди. Бу ҳақда «Футбол Кулички» «Краснодар» бош директори Владимир Хашигнинг «Матч-ТВ»га берган интервьюсига асосланиб маълумот берди.
«Шанхай SIPG»дан олдинроқ Аҳмедов билан Хитойнинг бошқа бир клуби «Шандонг Луненг» қизиқаётган бўлиб, у «Краснодар» ҳисоб-рақамига 8 миллион евро ўтказиб бериши кутилаётганди.
«Шанхай SIPG» 2016 йилги мавсумда Осиё футбол клублари учун рекорд бўлган суммага Халк ва Оскарни сотиб олганди. Халкнинг орқасидан «Зенит» 55,8 миллион евро ишлаб олган бўлса, Оскарни олиб келиш учун хитойликлар 70,5 миллион чиқим қилганди.
Маълумот учун, «Шанхай SIPG» клубини португалиялик мутахассис Андре Виллаш-Боаш бошқаради. Унинг қўл остида Халк ва Оскардан ташқари яна бир бразилиялик Элкесен, шунингдек, аргентиналик Дарио Конка, ивуарлик Жан Эврард Куасси, Жанубий Кореядан Ким Жу Юнг бор.
Хитой Супер Лигасида легионер футболчилар чеклови бор бўлиб, унга кўра 5 нафар хорижлик футболчи билан шартнома тузиш мумкин. Шуларнинг ҳеч бўлмаганда 1 нафари албатта осиёлик бўлиши керак.
Қайд этиш керак, Андре Виллаш-Боаш Одил Аҳмедов ҳаракат қиладиган Россия Премьер-Лигасида ишлаб, «Зенит» клубига устозлик қилганди. Бу эса мутахассис Аҳмедовнинг имкониятларини билишини билдиради.
Одил Аҳмедовни Ўзбекистон Олий Лигасида фаолият олиб бораётган мураббийлар ва клуб сардорлари 2016 йилнинг мамлакатдаги энг яхши футболчиси деб топганди.
Изоҳ (0)