O‘zbekiston Respublikasi tashqi ishlar vaziri Abdulaziz Kamilov mamlakatga amaliy tashrif bilan kelgan Qozog‘iston Respublikasi tashqi ishlar vaziri Yerlan Idrisov bilan uchrashdi. Bu haqda O‘zbekiston TIV matbuot xizmati xabar bermoqda.
Muloqot chog‘ida oliy darajadagi O‘zbekiston—Qozog‘iston aloqalari davomida erishilgan kelishuvlarni amalga oshirish nuqtai nazaridan ikki tomonlama munosabatlarni rivojlantirish masalalari muhokama qilindi.
Uchrashuvda 2017—2018-yillarda BMT Xavfsizlik kengashining doimiy bo‘lmagan a’zoligiga Qozog‘istonning saylanishi hisobga olingan holda xalqaro va mintaqaviy tashkilotlar doirasidagi vazirliklararo hamkorlik masalalariga alohida e’tibor qaratildi.
Suhbat davomida turli sohalardagi O‘zbekiston—Qozog‘iston muloqotini yanada chuqurlashtirish, jumladan, ikki tomonlama hamkorlik institutlari faoliyatini kuchaytirishdan ikki davlat ham birdek manfaatdor ekanligi qayd etildi.
Muhokama qilingan barcha masalalar bo‘yicha O‘zbekiston va Qozog‘iston pozitsiyalarining yaqinligi va muvofiq ekanligi ta’kidlandi.
Muzokaralarda Qozog‘istonning O‘zbekistondagi elchisi Yerik Utembayev ishtirok etdi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)