Alisher Navoiy nomidagi Kino saroyida namoyish etilgan “Ustyurtga yo‘l” nomli badiiy film tomoshabinlarda katta qiziqish uyg‘otdi. Bu haqda O‘zA xabar bermoqda.
Film O‘zbekiston Respublikasida 2016-yilda yoshlarga oid davlat siyosatini amalga oshirishga qaratilgan chora-tadbirlar dasturi ijrosini ta’minlash maqsadida “O‘zbekkino” milliy agentligi tomonidan “Qoraqalpoqfilm” kinostudiyasida suratga olingan.
Ushbu filmda Qoraqalpog‘iston Respublikasining Qo‘ng‘irot tumanidagi Ustyurt gaz-kimyo majmuasi qurilishi jarayonlari haqida hikoya qilinadi. Oliy o‘quv yurtini tamomlagan iste’dodli mutaxassis Nodir bir guruh tengdoshlari bilan ana shu tarixiy qurilishda ishtirok etish uchun Ustyurtga yo‘l oladi. Ular murakkab tabiatli bu maskanda ishlash jarayonida jiddiy sinovlarni boshdan kechirsa-da, ortga chekinmaydi.
Film Qoraqalpog‘iston Respublikasi, Xorazm viloyati, Toshkent shahri va Janubiy Koreyaning Seul shahrida tasvirga olingan.
Ssenariy mualliflari — Guliston Matyoqubova, Abduqayum Yo‘ldoshev, G‘ofir Shermuhammad. Sahnalashtiruvchi rejissor — Abduvohid G‘aniyev. Filmdagi asosiy rollarni Akbarxo‘ja Rasulov, Adiz Rajabov, Shahzoda Matchonova, Ko‘pjursin Allanazarov kabi aktyorlar ijro etgan.
Izoh (0)