Xalqaro valyuta jamg‘armasi (XVJ) direktorlar kengashi tez orada Fransiya sudining jamg‘armaning boshqaruvchi direktori Kristin Lagardni “o‘z xizmat vazifalarini bajarishda mas’uliyatsizlikka yo‘l qo‘yganlik”da aybdor deb topish haqidagi qarorini muhokama qiladi. Bu haqda XVJ rasmiy vakili Jerri Rays tarqatgan bayonotda aytiladi, deb yozadi “TASS”.
Fransiya Respublikasi sudi 19-dekabr kuni Lagardni Fransiya iqtisodiyot vaziri lavozimida ishlagan chog‘ida “o‘z xizmat vazifalarini bajarishda mas’uliyatsizlikka yo‘l qo‘yganlik”da aybdor deb topgan edi. Shu bilan birga, uning advokati Patrik Mezonnyov so‘zlariga ko‘ra, sud hech qanday jazo tayinlamagan.
Avvalroq Lagard Fransiya iqtisodiyot vaziri lavozimini egallab turgan paytda investor va siyosatchi Bernar Tapiga Adidas kompaniyasidagi ulushi uchun tovon puli to‘langanlik bilan bog‘liq beparvolikda gumon qilingan edi. Fransiya sudi XVJ rahbariga nisbatan rasmiy tergov ishini 2014-yilning avgustida boshlagan edi.
Izoh (0)