O‘z vaqtida O‘zbekiston milliy terma jamoasini boshqarib borgan va u bilan Osiyo Kubogining chorak finaliga chiqa olgan mutaxassis Rauf Inileyev faoliyatini Toshkentning “Obod” klubida davom ettiradi. Bu haqda klub matbuot xizmati xabar berdi.
Avvalroq Rauf Inileyevning o‘zi “Futbol Ekspress” gazetasiga bergan intervyusida “Obod” bilan muzokara olib borayotganini tasdiqlab, rahbariyat bilan qayta uchrashuvi borligiga sha’ma qilib o‘tgandi.
“Obod” 21-dekabr kuni yangi mavsumga tayyorgarlikni boshlaydi. Mashg‘ulotlar ilk kundanoq Inileyev boshqaruvida olib boriladi. 28-dekabr kuni kichik ta’til e’lon qilinib, yanvarning boshidan futbolchilar qayta yig‘iladi.
Ma’lumot uchun, 2016-yilgi mavsum Oliy Ligada debyut qilgan “Obod” 1-ligaga tushib ketmaslik uchun kurash olib bordi va yakunda 14-o‘rinni egallab, elitada o‘z o‘rnini saqlab qoldi. Bitta mavsum davomida klub kamida 3 nafar mutaxassis xizmatidan foydalandi. Ular orasida Aleksandr Mochinov, Ja’far Irismetov kabi nomlar bor. Yil boshida jamoani 1992-yilda tug‘ilgan Bobur Zuxriddinov ham boshqargandi.
“Obod”ni yangi qabul qilib olgan Rauf Inileyev 2007-yil yakunlariga ko‘ra Osiyoning eng yaxshi murabbiyi sifatida tan olingandi.
Izoh (0)