Ўз вақтида Ўзбекистон миллий терма жамоасини бошқариб борган ва у билан Осиё Кубогининг чорак финалига чиқа олган мутахассис Рауф Инилеев фаолиятини Тошкентнинг «Обод» клубида давом эттиради. Бу ҳақда клуб матбуот хизмати хабар берди.
Аввалроқ Рауф Инилеевнинг ўзи «Футбол Экспресс» газетасига берган интервьюсида «Обод» билан музокара олиб бораётганини тасдиқлаб, раҳбарият билан қайта учрашуви борлигига шаъма қилиб ўтганди.
«Обод» 21 декабрь куни янги мавсумга тайёргарликни бошлайди. Машғулотлар илк кунданоқ Инилеев бошқарувида олиб борилади. 28 декабрь куни кичик таътил эълон қилиниб, январнинг бошидан футболчилар қайта йиғилади.
Маълумот учун, 2016 йилги мавсум Олий Лигада дебют қилган «Обод» 1-лигага тушиб кетмаслик учун кураш олиб борди ва якунда 14-ўринни эгаллаб, элитада ўз ўрнини сақлаб қолди. Битта мавсум давомида клуб камида 3 нафар мутахассис хизматидан фойдаланди. Улар орасида Александр Мочинов, Жаъфар Ирисметов каби номлар бор. Йил бошида жамоани 1992 йилда туғилган Бобур Зухриддинов ҳам бошқарганди.
«Обод»ни янги қабул қилиб олган Рауф Инилеев 2007 йил якунларига кўра Осиёнинг энг яхши мураббийи сифатида тан олинганди.
Изоҳ (0)