Motorola’ning O‘zbekiston Respublikasidagi yagona avtorlashtirilgan dileri — Radiocom kompaniyasi seminarida noqonuniy ratsiyalar tarqalishiga qarshi kurash muhokama qilindi.
Yaqinda Toshkentdagi “Poytaxt” biznes-markazida Motorola Solutions’ning O‘zbekiston Respublikasidagi yagona avtorlashtirilgan dileri — Radiocom kompaniyasi resellerlari uchun seminar-trening bo‘lib o‘tdi. U resellerlarga mijozlar bilan yanada samaraliroq ishlash va noqonuniy keltirilgan radiostansiyalar tarqalishiga qarshi kurashish uchun konsultatsiya maqsadida o‘tkazildi.
Radiocom kompaniyasi koordinatori Mirvohid Jabborov noqonuniy ravishda keltirilgan radiouskunalar savdosiga qarshi kurash mavzusini ko‘tardi. U faqat sertifikatlangan radiostansiyalarni sotib olish muhimligini ta’kidladi, chunki shundagina xaridorda qonun bilan bog‘liq hech qanday muammolar bo‘lmaydi, o‘zlari sotib olayotgan radiostansiyalar uchun ishlab chiqaruvchining zavodi tomonidan kafolat bo‘ladi.
Seminarda radiostansiyalarni keltirish va ishlatishning qonunga muvofiqligi masalalari yoritildi. Bu haqda davlat tashkilotlari, muassasalar va xizmatlar vakillari gapirib berdi, shuningdek, resellerlarning barcha savollariga javob berdi.
Seminarning asosiy g‘oyasi radiostansiyalar qonuniyligi va ulardan foydalanish qoidalari masalasi bo‘ldi. Chunonchi, masalan, litsenziyalanmagan radiostansiyalarni butunlay erkin tarzda ishlatish mumkin. Litsenziyalanmagan degani — Yevropaning PMR446 standartiga mos keluvchi: bunday ratsiyalarning ruxsat berilgan quvvati 0,5 Vt dan oshmaydi, ishlash chastotasi esa 446—446,1 MGs diapazonida bo‘ladi. Ushbu standart dunyoning ko‘plab mamlakatlarida qabul qilingan va biznesning ko‘pchilik turlari talablariga to‘liq javob beradi. Bunday aloqa vositasining radiusi 10 kilometrgacha yetishi mumkin.
Ushbu standart doirasidan chiqadigan xususiyatga ega radiostansiyalar professional deb ataladi hamda foydalanish uchun chastota va alohida litsenziya talab qiladi. Elektromagnit moslik markazi (EMMM) va Davlat aloqa inspeksiyasi (DAI) radioaloqaning noqonuniy tarzda qo‘llanilishi yuzasidan doimiy ravishda monitoring va reydlar o‘tkazadi.
Agar EMMM professional ratsiyalar litsenziyasiz ishlatilishi holatini aniqlasa, — bu “Radioelektron vositalar va yuqori chastotali qurilmalardan foydalanish tartibi to‘g‘risida”gi qonunning buzilishi hisoblanadi. U holda qurilma egasi O‘zbekiston Respublikasining Ma’muriy kodeksi 152-moddasiga ko‘ra javobgarlikka tortiladi: undan qurilma musodara qilinadi va eng kam ish haqining uch baravaridan o‘n baravarigacha jarimaga tortiladi.
Shunisi e’tiborga loyiqki, 2016-yil boshidan buyon joriy chorakkacha bojxona xodimlari umumiy qiymati 9 million 369 ming so‘mga teng 95 ta radiostansiyaning noqonuniy olib kirilishi bilan bog‘liq 17 ta holatni aniqlashga ulgurdi. Natijada, ular bo‘yicha bitta jinoiy va 15 ta ma’muriy ish qo‘zg‘atildi. Ko‘pchilik hollarda odamlar shunchaki chet elda radioqurilmani sotib olib, buning uchun maxsus ruxsatnoma kerakligini bilmagan holda, mamlakatga olib kirishga urinadi.
Seminar yakunlariga ko‘ra, ishtirokchilar radiostansiyalarni noqonuniy ravishda keltirish va ishlatishga qarshi kurashning muhimligi bo‘yicha bir fikrga keldi, zero radioaloqa ham fuqarolik, ham harbiy maqsaddagi aloqa vositasi bo‘lgani tufayli, davlat manfaatlariga bevosita zarar yetkazadi.
Seminarda EMMM, DAI, Davlat bojxona qo‘mitasining kontrabandaga qarshi kurash bosh boshqarmasi, Radiochastotalar bo‘yicha davlat komissiyasi kabi turli davlat tashkilotlari va muassasalar vakillari qatnashdi. Anico kompaniyasi bosh direktori Jozef Deveniy, Motorola radiostansiyasining Rossiya va MDHdagi distributsiyasi bo‘yicha menejer Maksim Gavrilin hamda Motorola’ning Markaziy Osiyo, Ozarbayjon va Gruziyadagi sheriklik tarmog‘i rahbari Valeriy Moroz tadbirning maxsus mehmonlari bo‘ldi.
Reklama huquqi asosida
Izoh (0)