Namanganda Intellektual xizmatlar markazi ish boshladi. Markaz Vodiy Media nashriyoti, “Vodiymedia.uz” elektron gazetasi, veb-dizayn va dasturiy ta’minot xizmati, prodyuserlik studiyasi va tarjima xizmatini o‘z ichiga oldi. Bu haqda “Daryo” mobil muxbiri xabar bermoqda.
— Vodiy Media Farg‘ona vodiysidagi ilmiy adabiyotlarni chop etish huquqiga ega birinchi xususiy nashriyot hisoblanadi. Unda xorijiy tillarda ham risola va qo‘llanmalar chop etish rejalashtirilmoqda, — deydi jamiyat rahbari Dilmurod Jumaboyev. — “Vodiymedia.uz” vodiyda yuz berayotgan yangiliklarni tezkor, xolis va haqqoniy yoritib borishni o‘z oldiga maqsad qilib qo‘ygan.
Veb-dizayn va dasturiy ta’minot xizmati tashkilot, muassasa va biznes subyektlarining veb-saytlari va ularning mobil versiyalarini yaratish, tarjima xizmati ingliz, nemis, fransuz, turk, rus tillariga va bu tillardan o‘zbekchaga ilmiy va o‘quv adabiyotlar, nazmiy va nasriy asarlar, maqolalar, turli audio-video materiallar tarjimasini amalga oshiradi.
Prodyuserlik studiyasida esa roliklar, lavhalar va hujjatli filmlar tayyorlash, ularni televideniye va internet tarmog‘ida joylashtirish mo‘ljallanmoqda.
Qayd etish joizki, yangi markaz ish boshlashi bilan o‘ndan ziyod yangi ish o‘rni yaratildi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)