To‘g‘ri ovqatlanish – sog‘lom turmush tarzi asosidir. U organizmdagi ko‘plab kasalliklar va noqulayliklarni bartaraf etishga yordam beradi. Shuningdek, go‘zallikni, ya’ni terining sog‘lomligi, yuz rangining tiniqligi va qomatning xushbichimligini ta’minlaydi.
Har 3 soatda, bir kunda 5 mahal, oz-ozdan ovqatlanishga o‘rganing. 200 grammdan ko‘p ketmaydigan kichkina likopcha hamda unga mos qoshiqcha va sanchqi sotib oling.
Nonushta uchun bo‘tqa (yaxshisi – suli yormasidan), achitilgan sut mahsulotlari va mevalar iste’mol qilish tavsiya qilinadi. Mevalarni asosiy ovqatdan 20—30 daqiqa keyin yeganingiz ma’qul. Parhez shifokorlari tushlikka oqsil va (xom yoki dimlangan) sabzavot iste’mol qilishni tavsiya etadi. Oqsil sifatida yog‘siz go‘sht, baliq, jigar yoki tuxum yeyish mumkin. Kechki ovqatga esa, bir likopcha yog‘siz tvorog yoki bir piyola yog‘siz qatiq ichganingiz ma’qul. Uch mahal asosiy ovqatlanishlar orasida, ikki marta yengil tamaddi qilish kerak. Bu tamaddilarga, mevalar, yong‘oq va yogurtlar kiradi.
Har ovqatlanishdan 20 daqiqa oldin bir piyoladan suv iching. Ovqatlanayotganda va undan keyin 40 daqiqa davomida suv ichmaslikka harakat qiling. Bir kunda esa, 2 litrdan kam bo‘lmagan miqdorda suv ichishingiz zarur. Bundan tashqari, bir choy qoshiq asal bilan ko‘k choy ichish ham tavsiya etiladi.
Agar shirinlikni juda yaxshi ko‘rsangiz, kunning birinchi yarmida, uncha yog‘li bo‘lmagan pishiriqdan ozroq yeyishingiz mumkin. Shakarni asalga almashtirganingiz ma’qul. Kattalar bir sutkada 1—2 choy qoshiq asal iste’mol qilishi maqsadga muvofiqdir.
Oliy navli un mahsulotlaridan butunlay voz keching: olimlar uning organizm uchun haddan tashqari zararli ekanligini isbotladi. Yaxshisi, javdar yoki qora nonni tanlaganingiz ma’qul.
Izoh (0)