O‘zbekiston Yozuvchilar uyushmasida O‘zbekiston Qahramoni, xalq shoiri Erkin Vohidov tavalludining 80 yilligiga bag‘ishlangan tadbir o‘tkazildi. Unda shoir va yozuvchilar, adabiyot ixlosmandlari ishtirok etdi, deb xabar beradi O‘zA.
Yozuvchilar uyushmasi raisi M.Ahmedov va boshqalar Prezidentning O‘zbekiston xalq shoiri Erkin Vohidov tavalludining 80 yilligini keng nishonlash to‘g‘risida shu yil 7-dekabrdagi qarori mamlakatda adabiyotga, ma’naviyatga bo‘lgan yuksak e’tiborning yana bir yorqin ifodasi bo‘lganini ta’kidladi. Ushbu qaror ijrosi doirasida mamlakat miqyosida ulug‘ shoir tavalludining 80 yilligini keng nishonlash va uning xotirasini abadiylashtirish borasida keng ko‘lamli ishlar olib borilmoqda.
Yozuvchilar uyushmasi Erkin Vohidovning o‘zbek tilida “Saylanma” asarlarini, ingliz va qoraqalpoq tillariga tarjima qilingan she’riy to‘plamlarini nashrga tayyorlash va chop etish, shoir hayoti va ijodiy faoliyati haqida hujjatli film yaratish, asarlari asosidagi spektakllarni qayta namoyish etish, u yashagan uyda yodgorlik lavhasi o‘rnatish, mamlakatdagi oliy va o‘rta maxsus, kasb-hunar, umumiy o‘rta ta’lim muassasalari, harbiy qismlar, mehnat jamoalari va mahallalarda taniqli adib va olimlar, san’atkorlar ishtirokida uchrashuvlar, ilmiy konferensiyalar, adabiy kechalar tashkil etishda hamkor tashkilotlarga yaqin ko‘makdosh bo‘lmoqda.
Tadbirda “Onajonim — she’riyat” to‘garagi a’zolari Erkin Vohidov she’rlaridan namunalar o‘qidi.
Izoh (0)