Oliy Majlis palatalarining qo‘shma majlisida Abdulla Aripov O‘zbekiston Respublikasi bosh vaziri etib tasdiqlandi. Bu haqda UzDaily xabar bermoqda.
Oliy Majlis Qonunchilik palatasi va Senati 14-dekabr, chorshanba kuni qo‘shma majlis o‘tkazdi. Unda saylangan prezident Shavkat Mirziyoyev qasamyod keltirdi va lavozimiga kirishdi.
Majlisda, shuningdek, mamlakatning yangi bosh vazirini tayinlash to‘g‘risidagi masala ham ko‘rib chiqildi.
O‘zbekiston Respublikasi Prezidenti Shavkat Mirziyoyev parlament ko‘rib chiqishi uchun hozirda bosh vazir o‘rinbosari lavozimida ishlab kelayotgan Abdulla Aripov nomzodini taqdim etdi.
Abdulla Aripov deputatlar va senatorlarga hukumatning yaqin muddat hamda istiqboldagi harakat dasturini taqdim etdi.
Qonunchilik palatasi deputatlari va Senat a’zolari Abdulla Aripov nomzodini tasdiqladi.
Eslatib o‘tamiz, 12-dekabr kuni Tadbirkorlar va ishbilarmonlar harakati — O‘zbekiston Liberal-demokratik partiyasi Siyosiy Kengashi bosh vazir lavozimiga Abdulla Aripov nomzodini taqdim etgandi.
Konstitutsiyaga binoan, O‘zbekiston bosh vaziri nomzodi Qonunchilik palatasiga saylovda eng ko‘p deputatlik o‘rinlarini olgan siyosiy partiya tomonidan O‘zbekiston Prezidentiga ko‘rib chiqish uchun taqdim etiladi.
Diqqat, diqqat! “Daryo”ning Telegram’dagi rasmiy kanali — “Toshqin ‘Daryo’” (@toshqindaryo)ga obuna bo‘lib, yangiliklardan ovozli ko‘rinishda bahramand bo‘lishingiz mumkin.
Izoh (0)