13-dekabr kuni Toshkentda O‘zbekiston Respublikasi Oliy Majlisi Senatining sakkizinchi plenar yig‘ilishi bo‘lib o‘tdi. Uning davomida senatorlar O‘zbekistonning saylangan Prezidenti Shavkat Mirziyoyevning Respublika Konstitutsiyasining 24 yilligiga bag‘ishlab o‘tkazilgan tantanali marosimda so‘zlagan ma’ruzasida ko‘rsatilgan vazifalardan kelib chiqqan holda Senatning xalqaro munosabatlar, tashqi iqtisodiy aloqalar, chet el investitsiyalari va turizm yo‘nalishlaridagi faoliyatini rivojlantirish va jadallashtirish masalalarini ko‘rib chiqdi, deb xabar beradi UzReport.
Tashqi iqtisodiy aloqalarni amalga oshirish, jahon miqyosida milliy manfaatlarni himoya qilish, xalqaro iqtisodiy hamkorlikni kengaytirish, mamlakat mintaqalariga chet el investitsiyalari va zamonaviy texnologiyalarni jalb qilish, turizmni rivojlantirish, mamlakatning xalqaro imijini mustahkamlash, shuningdek, ushbu sohalardagi parlament nazoratini kuchaytirish maqsadida senatorlar Senat raisining birinchi o‘rinbosari lavozimini joriy etish haqida qaror qabul qildi.
Senat a’zolari Sodiq Safoyevni Oliy Majlis Senati raisining birinchi o‘rinbosari etib saylash to‘g‘risidagi masalani ko‘rib chiqib, uni ushbu lavozimda tasdiqlash to‘g‘risida tegishli qaror qabul qildi.
Eslatib o‘tamiz, senatorlar Shavkat Mirziyoyevni Bosh vazir lavozimidan ozod etish to‘g‘risida ham qaror qabul qildi.
Izoh (0)