Istanbulda sodir bo‘lib, 29 kishini hayotdan olib ketgan qo‘sh terakt tufayli, Turkiyaning butun hududi bo‘ylab milliy motam e’lon qilindi, deb yozadi “TASS”. Tegishli farmonni mamlakat bosh vaziri Binoli Yildirim imzoladi.
Buyruqqa muvofiq, barcha davlat muassasalarida davlat bayroqlari tushiriladi.
Portlashlar Istanbulda mahalliy vaqt bilan 10-dekabr, shanba kuni taxminan 22:30 da (Toshkent vaqti bilan 11-dekabr 00:30 da) Vodafone Arena stadionining shimoli-g‘arbiy devori yonidan o‘tgan yo‘lda hamda arena yaqinidagi bog‘da yuz berdi. Yo‘lda politsiya maxsus topshiriqli bo‘linmalari o‘tirgan avtobus yaqinida portlovchi moddalar bilan to‘ldirilgan mashina portlatib yuborildi. Bir necha soniyadan so‘ng bog‘ga xudkush terrorchi hujum qildi.
So‘nggi ma’lumotlarga ko‘ra, qurbonlar soni 29 kishini tashkil qildi, ularning 27 nafari huquq-tartibot organlari xodimlaridir. 166 kishi jarohatlandi, ularning ko‘pchiligi og‘ir ahvolda. Turkiya ichki ishlar vaziri teraktni tashkil qilishga aloqadorlikda gumonlanib, o‘n kishi hibsga olinganini ma’lum qildi.
Izoh (0)