Истанбулда содир бўлиб, 29 кишини ҳаётдан олиб кетган қўш теракт туфайли, Туркиянинг бутун ҳудуди бўйлаб миллий мотам эълон қилинди, деб ёзади «ТАСС». Тегишли фармонни мамлакат бош вазири Биноли Йилдирим имзолади.
Буйруққа мувофиқ, барча давлат муассасаларида давлат байроқлари туширилади.
Портлашлар Истанбулда маҳаллий вақт билан 10 декабрь, шанба куни тахминан 22:30 да (Тошкент вақти билан 11 декабрь 00:30 да) Vodafone Arena стадионининг шимоли-ғарбий девори ёнидан ўтган йўлда ҳамда арена яқинидаги боғда юз берди. Йўлда полиция махсус топшириқли бўлинмалари ўтирган автобус яқинида портловчи моддалар билан тўлдирилган машина портлатиб юборилди. Бир неча сониядан сўнг боғга худкуш террорчи ҳужум қилди.
Сўнгги маълумотларга кўра, қурбонлар сони 29 кишини ташкил қилди, уларнинг 27 нафари ҳуқуқ-тартибот органлари ходимларидир. 166 киши жароҳатланди, уларнинг кўпчилиги оғир аҳволда. Туркия ички ишлар вазири терактни ташкил қилишга алоқадорликда гумонланиб, ўн киши ҳибсга олинганини маълум қилди.
Изоҳ (0)